Tribunál Rekursu Rezeite Rekursu Emilia Pires Featured

By Martinha Gusmao Jullu 30, 2019 4135
Presidente Tribunal Rekursu Presidente Tribunal Rekursu

DILI: Tribunál Rekursu (TR) rezeita pedidu rekursu husi arguida Emilia Pires relasiona ho desizaun TR hodi anula kazu eis Ministra Finansa ne’e. Iha 27 Juñu 2019, TR desiza anula kazu arguida Emilia Pires hodi husu ba Tribunal Distrital Dili (TDD) atu hadia prosesu molok foti desizaun defenitivu.

Tuir desizaun TDD, arguida Emilia hetan pena prizaun tinan 7 relasiona ho kazu krime partisipasaun ekonomia no negosiu.

Defeza husi arguida Emilia, José Camoes hatete, ninia kliente aprezenta rekursu ba TR tanba konsidera desizaun TR nian hodi anula ninia kazu ladun loos no viola regras. Tuir José Camoes, desizaun TR ne’e viola direitu umanus, viola regra penal no prosesual.

Ho razaun hirak ne’e, defeza hatete, ninia kliente deside manda pedidu rekursu ba TR iha 20 Jullu 2019 ho númeru prosesu 1212/12.PDDIL. Maibé, Camoes informa, iha 29 Jullu 2019 liu husi ninia resposta, Tribunál Rekursu deklara rezeita pedidu rekursu husi arguida Emilia ho razaun rekursu refere inkonstituinal.

“Rekursu ne’ebé Emilia Pires aprezenta ne’e kona-ba inkonstiuinalidade tanba ne’e mak Tribunál rekursu dehan katak rezeita, ho liafuan seluk Tribunál Rekursu julga improsedente ba rekerimentu ne’ebé arguida hato’o,” dehan Camoes ba jonalista sira iha Timor Plaza, Segunda (29/07).

Iha ninia desizaun, defeza ne’e dehan, Tribunál Rekursu dehan ba arguida Emilia atu labele halo tan rekursu (rekursu fica Esgotadu) tanba TR labele deside tan rekursu husi Emilia nian.

“Tribunál Rerkursu husu ba Tribunál Distritál Dili atu halo abertura rejulgamentu ba prosesu ida antes ne’e. Nune’e mos husu ba parte defeza sira labele halo tan rekursu hodi kontra desizaun Tribunál Rekursu nian,” nia informa.

Rate this item
(0 votes)

Independente Digital TV