Reativa Artemarsiais? La Hetan! Featured

By Pedro Alves Jullu 25, 2019 4856
Ministru Filomeno Paixao. Foto INDEPENDENTE Ministru Filomeno Paixao. Foto INDEPENDENTE

DILI: Hahalok husi pesoal grupu artemarsiais ne’ebé sempre provoka konflitu halo governu laiha vontade atu reativa sira-nia atividade.

Ministru Defeza no Seguransa, Filomeno Paixão hatete, defisil ba governu atu autoriza fila fali grupu artemarsiais ne’ebé bandu ona hodi halo sira-nia atividade tanba sira kontinua kria konflitu.

“Atu reativa artemarsiál lae karik, tanba sira oho malu beibeik hanesan ne’e, karik hakarak ativa fali governu mak iha vontade tanba konstituisaun hatete ema hotu iha diretu atu harii asosiasaun, maibé iha lei balun bandu,” dehan Ministru ne’e iha Palasiu Governu, Kuarta (24/07).

Ministru ne’e hatete, governu bandu grupu hirak ne’e atu hala’o atividade hodi fó oportunidade ba sira hadia an.

“Maibé lae, oho malu, ne’e atu loke la hetan, karik arte marisias funu ho FFDTL no PNTL, prontu.”

“Konflitu ne’e mosu tempu naruk dezde uluk to’o agora, ba oin sei laiha toleránsia ba sira hanesan agora daudaun polisia halo atuasaun.”

Iha oportunidade ne’e Ministru ne’e mós fó Kritika ba seitór justisa ne’ebé la ajuda polisia hodi fó sansaun ne’ebé merese ba pesoal husi grupu artemarsiais ne’ebé komete krime.

“Presiza serbisu integradu, tanba polisia esforsu ba kaer, mais fó TIR (Termu Identidade Rezidensia) nia lao lakon tiha, mosu mai kaer nafatin de’it nune’e husik oho malu de’it ba”.

Kona-ba esforsu governu atu bele rezolve problema entre grupu artemarsiais, Ministru ne’e dehan, durante ne’e Komisaun Regulador Artemarsial (KRAM) halo beibeik konsulta maibé to’o ohin loron seidauk iha rezultadu.

Ho nune’e, nia informa, KRAM hakerek ona proposta ba Primeiru Ministru atu kria ekipa task force atu tuun ba hala'o kontrolu integradu hodi bele identifika loloos problema nia huun.

Maibé, nia hatete, PM kontinua fó fiar nafatin ba KRAM atu haree ba kestaun ne’e.

Rate this item
(0 votes)

Independente Digital TV