Domingu, 05 Abril 2020 | Login
Veteranu sira Veteranu sira

Prosesu Tranzisaun Presiza Apoiu Veteranu Featured

DILI: Kontribuisaun veteranu sira nian ba nasaun ne’e seidauk remata. Servisu boot ida sei hein hela sira atu bele akompaña jerasaun foin sira iha prosesu tranzisaun ba dezenvolve nasaun ne’e.

Durante tinan 24 nia laran, veteranu sira luta hodi liberta ona nasaun ne’e no oferta independente totál ba povu Timor-Leste tomak, maibé kontribuisaun ne’e la remata to’o iha ne’e.

Nasaun ne’e sei presiza nafatin sira atu bele kontinua apoiu jerasaun foun sira atu kompriende espíritu servisu ba komunidade no espíritu servisu ba nasaun.

Prezidente Repúblika (PR), Francisco Guterres ‘Lú-Olo’ dehan, veteranu tenke kontinua kaer metin valór onestidade, kredibilidade, seriedade, espíritu sakrifísiu ne’ebé importante tebes hodi manan povu nia fiar no to’o ba restaurasaun independénsia.

Mehi no esperansa atu haburas rai ida ne’ebé di’ak liután, komunidade moris ho laran haksolok liután, la ho ki’ak maka hanesan matadalan ba rezisténsia no povu nia luta, maibé seidauk realiza objetivu sira ne’e.

“Ha’u husu veteranu sira-nia kontribuisaun hodi tulun jerasaun foun sira atu komprende espíritu servisu ba komunidade no espíritu servisu ba nasaun hodi nune'e bele hakat lailais liután ba dezenvolvimentu nasionál”, dehan Xefe Estadu, iha diskursu komemorasaun loron Nasionál Veteranu, iha Palásiu Governu, Sábadu (3/3).

Lú-Olo dehan, veteranu hotu nia kna’ar ohin loron nian maka hakle’an demokrasia, hametin pás no estabilidade nasionál. Sira presiza hala’o knaar importante ida hodi tulun hametin objetivu ne'e.

Xefe Estadu ne’e mós defende dezenvolvimentu ekonómiku no dezenvolvimentu emprezariál. Dezenvolvimentu setór privadu nian ezije kompeténsia téknika no ezije mós valór morál sira-ne'ebé metin.

Bainhira la ho valór ne’e, bele loke odamatan ba korrupsaun no halakon konfiansa sidadaun sira-nian iha instituisaun nasionál. Ne’e signifika nega buat hotu ne’ebé rezisténsia no determinasaun povu nian lori mai nasaun liuhusi restaurasaun independénsia.

Dezenvolvimentu nasaun nian presiza sidadaun sira nia dedikasaun, inklui veteranu sira nian, no presiza mós espíritu servisu.

Lú-Olo dehan, sidadaun hotu tenke hakat ba oin ho urjente hodi hatutan valór lubuk ida ba jerasaun foun sira, hanesan valór Estadu ida ne'ebé moos, valór dedikasaun ba estudu no serbisu hodi harii futuru ida ne'ebé di’ak.

Xefe Estadu ne’e mós husu ba veteranu sira no sidadaun hotu-hotu atu fó kontribuisaun boot ba objetivu hirak-ne'e. Rekoñesimentu ne’ebé nasaun fó ba veteranu sira hasa’e veteranu sira-nia responsabilidade iha nasaun nia oin.

Veteranu Tenke Organiza Malu


 

Entretantu, Xefe Estadu Maiór FALINTIL-Forsa Defeza Timor Leste (F-FTDL), Koronél Falur Rate Laek, husu ba veteranu sira atu hahú ona organiza malu hodi konsolida fali estrutura veteranu nian atu hasoru prosesu tranzisaun iha era dezenvolvimentu no governasaun ne'ebé de’it.

Rekoñesimentu veteranu iha ukun-aan ne’e mai husi prosesu rua prosesu dahuluk mak luta ba libertasaun nasionál no prosesu daruak mak harii nasaun. Ida ne’e mak buat ida susar no difisil tebes. Tanba envolve ema barak, inklui rekursu no interese barak liután. Tanba ne’e, mak presiza duni ema hotu nia kontribuisaun para prosesu sira ne’e bele la'o. 

Read 437 times Last modified on Kinta, 08 Marsu 2018 14:40
Rate this item
(0 votes)
MidAd1