Asinatura tratadu foun ne’e sei halo iha Sekretáriu Jerál ONU, António Guterres nia-oin, maibé tuir ajenda sei la hola parte husi Primeiru Ministru Austrália, Malcom Turnbull no Primeiru Ministru Timor-Leste, Mari Alkatiri.

“Iha ona konfirmasaun ofisiál katak Primeiru-Ministru Austrália nian sei la marka prezensa iha serimónia asinatura tratadu ne’e nian, no tanba ne’e laiha entidu atu Primeiru Ministru Timor-Leste nian dezloka ba Novaiorke iha loron 6 fulan-Marsu ne’e”, deklara PM Alkatiri, liu husi nota komunikadu imprensa ne’ebé diáriu ne’e asesu, horisehik.

Asinatura dokumentu fronteira marítima foun ne’e, Governu Timor-Leste nian sei reprezenta husi Adjuntu Primeiru Ministru, Hermenegildo ‘Agio’ Pereira no Governu Austrália reprezenta husi Ministra Negósiu Estranjeiru, Julie Bishop.

"Konteúdu husi akordu ne’ebé sei halo entre Timor-Leste no Austrália ne’e ko’alia liu kona-ba delimitasaun liña ketan-tasik nian entre nasaun rua ne’e, no la ko’alia kona-ba aspetu sira ne’ebé relasiona ba esplorasaun Greater Sunrise nian”, dehan Xefe Governu.

Hafoin asinatura, tratadu ne’e sei hetan ratifikasaun husi Parlamentu Timor-Leste no Austrália nian, no tuirmai sei vigora iha ordenamentu jurídiku internu nasaun rua ne’e nian.

Antes ne’e, Prezidente Komisaun Konsiliasaun Embaixadór, Peter Taksøe-Jensen hateten, hafoin fasilita ekipa nasaun Timor-Leste no Austrália ne’ebé konkorda ona iha tuku 17.00, lokraik, iha loron 6 Marsu 2018, iha Novaiorke sei asina nota tratadu fronteira marítima foun.

Nune’e, Komisaun sei finaliza sira-nia relatóriu kona-ba prosesu ne’e. Relatóriu ne’e sei fó sai ba públiku iha fulan Abríl tinan 2018 nia-klaran.

Antes ne’e, Komisaun Konsiliasaun hala’o nia soru-mutu ikus iha semana kotuk, hahú husi loron 19 Fevereiru 2018, iha Kuala Lumpur ho Timor-Leste no Austrália no Joint Venture ba Greater Sunrise nian.

Parte sira konkorda ona akordu ba tratadu ida ne’ebé delimita fronteira marítima entre sira iha Tasi Timor.

Komisaun mós fasilita nasaun rua ko’alia kona-ba estatutu legál kampu gás Greater Sunrise nian hodi estabelese Rejime Espesiál ida ba Greater Sunrise no dalan hodi dezenvolve rekursu ne’e.

Tratadu ne'e mós estabelese akordu hodi fahe reseita entre governu Timor-Leste no Austrália iha ne’ebé reseita upstream aloka ba parte idak-idak sei la hanesan depende ba benefísiu husi downstream nian.