Sábadu, 07 Dezembru 2019 | Login
Operasaun konjunta KAK, PNTL, DNTT Operasaun konjunta KAK, PNTL, DNTT

Prende Karreta ADN, Xanana Vizita Edifísiu KAK no PNTL Featured

DILI: Komisaun Anti Korrupsaun (KAK) halo pasa revista ba karreta estadu nian ne’ebé halo movimentu iha tempu feriadu. Nune’e, iha operasaun ne’ebé halo konsege prende veíkulu husi instituisaun Estadu nian lubuk ida.

Operasaun konsege prende mós karreta husi Ajénsia Dezenvolvimentu Nasionál (ADN), Ministériu Públiku (MP), FALINTIL-Forsa Defeza Timor-Leste (F-FDTL), Polisia Nasionál Timor-Leste (PNTL), inklui instituisaun sira seluk.

Tuir informasaun ne’ebé diáriu ne’e rekolla, husi karreta ADN nian ne’ebé prende hetan kedas reasaun husi Eminente Espesiál g7+, Kay Rala Xanana Gusmão.

Informasaun ne’ebé diáriu ne’e rekolla husi fonte ne’ebé besik ADN deklara katak, hafoin karreta ne’e prende Xanana halo kedas vizita ba edifísiu KAK nian iha Faról, maibé la tama ba edifísiu laran. Ekipa sira maka tun hodi halo negosiasaun ho funsionáriu KAK nian.

Nune’e, hafoin rona husi ekipa KAK nian katak karreta ADN nian ne’e lori ona ba Kuartél Jerál PNTL, entaun Xanana ho ninia ekipa kontinua halo vizita ba Kuartél Jerál PNTL, maski nune’e, eis-Primeiru Ministru Governu Aliansa Maioria Parlamentár (AMP) ne’e la tun husi karreta.

Ekipa sira Halo maka tun hodi ba haree karreta ne’e no halo diskusaun ho membru PNTL sira iha kuartél laran.

Maski nune’e, rezultadu ikus liu, karreta ADN nian ne’e kontinua prende tanba konsidera viola regra uzu patrimóniu estadu nian.

Entretantu, Adjuntu Diretór Jerál AND, Rui Lourenço da Costa hateten, karreta ADN nian ne’e konduz husi asesór ADN nian ida husi Indonézia ne’ebé mai servisu iha Timor-Leste tanba kooperasaun G to G.

Asesór ne’e mai servisu ho saláriu tuir padraun nasionál nian no mós hetan priviléjiu husi Governu Timor-Leste hodi fó tratamentu dignu ba nia durante iha Timor-Leste.

“Tanba ne’e, Governu iha responsabilidade hodi fornese transporte ba sira nia atividade partikular no servisu loron-loron nian”, dehan Rui.

Tuir nia, asesór ne’e la halo infrasaun tanba tanba hetan autorizasaun husi Diretór Jerál no iha karta kondusaun. Maibé, KAK konsidera ema ne’e envolve infrasaun hodi kontinua prende ninia karreta, inklui pesoál ne’e detein iha sela durante oras 72 hodi submete ba prosesu investigasaun.

“Proxima-vés labele trata ami hanesan na'ok-teen. Ami nia staff halo servisu sira tenke respeita”, tenik nia.

Tuir Rui, situasaun ne’e halo Governu maka sei moe tanba prezensa asesór nian iha Timor-Leste bazeia ba kooperasaun G to G, ne’ebé bazeia ba pedidu husi Timor-Leste nian. Ne’e duni, Governu iha responsabilidade ba pesoál ne’e rasik.

Entretantu, informasaun ne’ebé diariu ne’e hetan, KAK prende no detein asesór ADN nian ba sela tanba konsidera halo infrasaun, liuliu utiliza veíkulu Estadu nian iha loron feriadu ba atividade privadu nian.

“Ami ezekuta de’it lei ne’ebé maka iha. Ami la'ós prende karreta sira ne’e tuir ami ninia hakarak”, dehan fonte ne’e.

 Operasaun Kontinua Veíkulu Estadu Kontinua

Entretantu, antes ne’e, Komisáriu KAK, Sérgio Hornai hatete, atividade operasaun ba veíkulu estadu kontinua la’o hodi bele minimiza infrasaun husi funsionáriu públiku sira iha tempu férias.

Atividade operasaun ne’e rasik lidera husi KAK, Komisaun Funsaun Públiku (KFP), Diresaun Nasionál Transporte Terestre (DNTT), Patrimóniu Estadu no Polisia Nasionál Timor Leste (PNTL).

“Operasaun konjuntu ne’e atu ita bele minimiza poténsia sira ne’ebé mak atu lori ita ba iha situasaun balun hodi ba iha dezgastu utilizasaun patrimóniu estadu nian, liuliu iha viatura karreta no motorizada sira ne'ebé sirkula iha loron feriadu, liuliu iha Sábadu no Domingu”, dehan Sérgio ba jornalista sira iha serimónia enseramentu bazar baratu iha Sentru Konvensaun Dili (CCD) (29/06).

Iha kestaun téknika tátika operasaun nian, ne’ebé mak husi servisu investigasaun kriminal no KAK nian halo hamutuk ho ekipa konjuntu PNTL liu husi Diresaun Nasionál Rodaviariu, Diresaun Nasionál Transporte Terestres no Patrimóniu Estadu.

“Ita hakarak neineik hotu-hotu bele hatane katak uza sasán patrimóniu estadu nian ho kuidadu tebe tebes hodi bele iha efisiénsia no efikásia no efetividade”, dehan nia.

Sergio afirma, Portantu ida ne’e mak sai hanesan baze fundamentál ba iha komisaun anti korrupsaun oinsá mak bele halo atividade operasaun konjuntu ida ne’e, tanba rezultadu balun iha submete hela ba iha prosesu investigasaun,karik iha inidisiu krime ne'ebé mak iha, karik iha krime koneksu ruma ne'ebé mosu ba iha utilizasaun viatura estadu nian ba iha atividade ne'ebé mak la'ós apropriadu.

Hotu-hotu iha direitu atu diretór ka xefe departamentu bele iha direitu uza sasán estadu nian, maibé tenke ba iha atividade estadu nian ba iha servisu públiku ka servisu ne'ebé fó asisténsia ba povu, se laiha karreta tenke para.

Husi operasaun ne’ebé durante ne’e la’o, veíkulu estadu nian kuaze 20-resin halo hela investigasaun, balun laiha duni objetu maka prende maibé karik iha dokumentu ruma ne’ebé justifikativu husu ba iha patrimóniu estadu atu bele liberta.

Read 1270 times
Rate this item
(0 votes)