Reprezentante Veteranu Munisipiu Kovalima, Osório ‘Mausoco’, preokupa ho situasaun politika ohin loron nian, tan ne’e, husu ba lider politiku sira hanesan Xanana Gusmão, Taur Matan Ruak, Francisco Guterres Lú Olo no Mari Alkatiri atu tenke kria unidade hodi bele hanorin no eduka politika di’ak ba joven foin sa’e.

Mausoco dehan, maske lider sira ne’e diferente partidu politiku no kritika malu, maibé importante liu mak bainhira hasoru-malu nafatin hatudu oin-midar ba malu.

“Iha palku politika, mezmu lider diferenta iha partidu, no kritika malu iha palku politika nu’udar parte husi demokrasia, importante liu bainhira hasoru malu iha kualker fatin sira hatudu oin-midar ba malu ho unidade hanesan iha tempu rezistensia,” dehan nia durante dialogu ho Prezidente Repulika, Francisco Guterres Lú Olo, iha salaun enkontru Feto Santa Rosa, Munisipiu Kovalima, Sesta (28/6).

Iha oportunidade ne’e, veteranu ne’e mós husu ba jerasaun foun sira atu labele insulta ka ataka lider istoriku sira.

“Ami preokupa tebes ita-nia joven sira, liu–liu iha Parlamentu Nasionál, labele selok malu to’o insulta ita-nia lidera sira, imi labele halo hanesan ne’e, tanba iha tempu rezistensia ami (veteranu) sira ne’e mak subar Maun Xanana, Maun Lú Olo no ita-nia lider sira seluk,” deklara Mausoco.

Iha fatin hanesan, PR Lu Olo dehan, tempu to’o ona atu lider sira serbisu hamutuk hodi kria planu integradu ne’ebé bele halibur ideia no matenek hodi rezolve problema nasaun no lori povu sai husi mukit.

“Ami nu’udar lider politikus iha responsabilidade boot atu halo politika di’ak rezolve ita-nia nasaun, ita-nia povu nia problema, sai hanesan serbisu boot ida, ne’ebé ita mak tenke hamutuk atu halo ida ne’e tuir votus no konfiansa ne’ebé povu fó ona ba ami,” dehan PR Lu Olo.

Lu Olo dehan, kompromisiu iha luta mak atu hadia povu nia moris. Komprimisiu ida ne’e lider politiku hotu-hotu tula iha sira-nia kabaas hanesan todan boot ba konfiansa ne’ebé povu fó ba sira liu husi eleisaun jerál kada tinan liman.

“(Liu husi eleisaun) hili paritidu ida kaer ukun no lider uza oportunidade ukun atu haree no hadia povu nia moris nu’udar interese aas liu buat hotu-hotu”.

Xefe Estadu ne’e mós husu ba veteranu sira labele fahe malu tanba de’it kór politika no hada’u-malu projetu eletrisidade hodi halo povu sira sofre, moris iha nakukun nia laran.

Lu Olo dehan, nia hatete iha Kovalima veteranu balun tanba de’it hada’u-malu projetu, sira husik hela sira-nia resposanbilidade morál nu’udar luta nain atu tau-matan ba problema sosial ne’ebé povu sira hasoru iha área edukasaun, saúde, bee-moos, Estrada.

“...no eletrisidade ne’ebé seidauk dada hodi lakan iha povu nia uma,” dehan Xefe Estadu ne’e.