PN La Hapara Sosa Karreta Foun, Sosiedade Ezije PR Veta OJE Featured

By INDEPENDENTE Novembru 15, 2018 2151

DILI: Parlamentu Nasionál kontinua firme ho pozisaun hodi kontinua prevé orsamentu ba sosa karreta foun. Ne’e duni, sosiedade sivíl konsidera deputadu sira laiha vontade atu halo diálogu.

Tanba ne’e, Forum Organizasaun Naun Governamentál Timor-Leste (FONGTIL) no rede sosiedade sivíl ezije ba Presidente Repúblika, Francisco Guterres ‘Lú Olo’ atu veta Orsamentu Jerál Estadu (OJE) 2019, liuliu verba ba orsamentu sosa karreta foun.

Diretór Ezekutivu FONGTIL, Daniel Santos do Carmo hateten, PN laiha ona kredibilidade hanesan reprezentante povu hodi solusiona ezijénsia ne'ebé MUTL hato’o.

“Sira laiha ona vontade polítika la halo ona esforsu atu rekolla fila-fali karreta Prado ne’ebé sei iha hela eis-deputadu sira nia liman”, tenik nia, iha edifísiu FONGTIL-Kaikoli, horisehik

Sosiedade sivíl konsidera PN nu’udar órgaun Estadu nian maibé agora sai fali fasilitador ba violasaun direitu umanu.

PN hakarak atu hetan ninia kredibilidade iha povu mukit nia oin, di'ak liu halo ona rezolusaun imediata ida hodi dada hikas karreta tuan PN nian ne'ebé eis-deputadu sira atualmente privatiza ona.

Sei ida ne’e mak PN la konsidera sosiedade sivíl sei hamutuk ho estudante juventude no komunidade husi munisípiu 12 inklui RAEOA, sei uza meiu legál hodi kontra desizaun PN.

UNTL La Organiza MUTL Halo Manifestasaun

Universidade Nasionál Timor Lorosa’e (UNTL) rejeita organiza MUTL halo manifestasaun hasoru Parlamentu Nasionál.

Reitór UNTL, Francisco Miguel Martins hateten, asaun ne’ebé MUTL halo bazeia ba konstituisaun ne’ebé fó dalan sidadaun hotu livre atu halo manifestasaun.

Nia hatutan, MUTL ne’e kombinasaun husi universidade hotu no mós juventude.

Ho manifestasaun ne'ebé MUTL halo, atu husu ba polítiku na’in para hataan ezijénsia MUTL nian, tanba sira hanesan sidadaun ka konfiansa inan-aman ne'ebé laiha forsa atu ko’alia ho polítiku na'in sira, entaun sira haruka oan sira mak hasoru hodi bele rezolve ho na'i ulun sira kona-ba preokupasaun povu nian.

“Ha’u laiha kbiit atu bandu MUTL, tanba laiha Lei hodi bandu manifestasaun ne'ebé MUTL halo”, tenik Reitór.

Importante fó autoridade seguransa katak maski estudante tuir atividade hirak ne’e, maibé keta haluha oras aula nian. Ba estudante ne'ebé la tuir aula sei hetan sansaun husi universidade.  

Rate this item
(0 votes)

Independente Digital TV