Sexta, 28 Fevereiru 2020 | Login
PN Hasai Imunidade Kalohan-Assanami

PN Hasai Imunidade Kalohan-Assanami Featured

DILI: Parlamentu Nasionál (PN) liu husi votasaun sekretu deside hasai ona imunidade deputadu António da Conceição ‘Kalohan’ no Mariano ‘Assanami’ Sabino hodi kumpre pedidu Tribunál Munisipál Dili no Baukau nian.

Iha leitura ne’ebé halo husi Komisaun A PN katak, deputadu António da Conceição Kalohan Tribunál Munisipál Baukau fó termu hanesan argidu ba kazu partisipasaun atividade ekonómika ne’ebé sei hahú prosesu julgamentu, ohin (14/11).

Nune’e, deputadu Mariano Assanami Sabino hanesan sasin ba kazu karau susubeen ne’ebé rejistu iha Tribunál Munisipál Dili.

Deputadu Mariano Assanami hatete, pedidu Tribunál Munisipál Dili nian ne’e mai atu sai hanesan sasin ba kazu eis vise-Ministru Agrikultura no Peska, Marcos da Cruz, relasiona ho importasaun karau susubeen nian.

Kazu ne’e rejistu iha tinan 2015 iha tempu V Governu Konstitusionál nian, entaun haree ba kazu ne’e kleur loos ona julgamentu mós adia beibeik. Tanba ne’e, hanesan ministru iha momentu ne'ebá sei fó sasin ho hakerek atu iha julgamentu kontinuasaun iha karik bele halo de’it leitura.

“Kazu ne’e relasaun ho karau susu been ne’ebé uluk ha’u sai hanesan Ministru Agrikultura, momentu ha’u laiha fatin maibé Vise MAP mak halo asinatura hodi halo prosesu pagamentu”, dehan nia, iha Uma Fukun PN, horisehik.

Iha fatin hanesan, Deputadu António da Conceição Kalohan hatete, kazu ne’ebé rejistadu iha Tribunál Munisipál Baukau relasiona ho Ministériu Komérsiu Indústria no Ambiente (MKIA) nia intervensaun hodi fó ajuda umanitária ba povu suku lima iha postu administrativu Vemasi, Munisípiu Baukau iha tinan 2014 liubá.

Haree ba kazu ne’e kleur loos ona, maibé dada hela de’it tanba ne’e hanesan argidu ida halo pedidu ba PN atu hasai ona imunidade atu bele koopera hamutuk ho parte justisa nian hodi hakotu kazu ne’e.

Nia hatete, kazu ne’e akontese tanba momentu ne'ebá povu suku lima ne’e hetan afetadu el-nino entaun sira la halo kolleita ba sira nia produtu povu sira hamlaha.

Iha momentu ne'ebá PN rasik balun kestiona no hanesan MCIA iha momentu ne'ebá hetan pedidu direita husi povu liu husi xefe suku, tanba ne’e hanesan ministru halo intervensaun oinsá atu responde ba povu nia preokupasaun.

“Pedidu mai iha ne’e atu halo ajuda umanitária la'ós intervensaun merkadu. Pedidu ne’e dehan intervensaun umanitária, entaun ha’u konsidera ne’e responsabilidade governu nian, iha armazein mós foos disponivel atu fahe maibé ha’u mós laiha dadus loloos atu fahe karik ba ema na'in hira”, tenik nia.

Laiha númeru ne’ebé serteza tanba ne’e MCIA momentu ne'ebá deside liu husi Administradór Postu Vemasi mak halo intervensaun.

Iha ne'ebá sira ba sosa foos iha armazein kada foos saku ida $9, tanba ne’e ba fa'an tutan karik nia folin $12 kada saku ida, maibé sira ba iha terenu oin seluk fali.

Kada foos saku ida sira fa'an to’o fali $13 to’o $15, tanba ne’e iha momentu ne'ebá hanesan ministru, entaun tribunál fó estatutu ida ohin loron sai hanesan argidu ba iha partisipasaun atividade ekonómika ne’e.

 

Read 1770 times Last modified on Domingu, 10 Marsu 2019 18:31
Rate this item
(0 votes)
MidAd1