Ba orientasaun ne’e, deputadu bankada CNRT Aderito Hugo fó hatene katak Xanana sei orienta estrutura partidu nian atu asegura governasaun AMP ne’ebé tinan rua resin ona hasoru impase politika.
Orientasaun Xanana ne’e, Hugo dehan, sei hato’o ba kuadru no militante CNRT sira liu husi gravasaun filmajen tanba Xanana daudauk ne’e sei hala’o serbisu estadu nian iha rai li’ur.
“Orientasaun Maun Xanana nian ne’e husu ba kuadrus partidu CNRT nian atu kontinua asegura nafatin VIII Governu Konstitusional,” dehan Hugo.
Iha fatin hanesan, Prezidente Bankada CNRT, Duarte Nunes bainhira hatan kona-ba hanoin balun atu halo avaliasaun ba serbisu membru governu sira nian, hatete, hanoin ne’e validu.
Maibé, atu halo ida ne’e, la’os CNRT mesak maibé presiza envolve mós partidu sira seluk iha AMP.
“Bloku ne’e bainhira mak atu hamutuk hodi halo avaliasaun ne’e hein de’it,” dehan nia.
Tuir nia, hanoin ne’ebé fó sai ona nu’udar alarma ida atu fanu ema hodi haree asuntu refere.
“Partidu tolu hanesan CNRT, PLP no KHUNTO iha konsellu deritiva nasionál AMP nian, sira kuandu oraganiza bele realiza ona avaliasaun ne’e,” katak nia.
