"Ha'u hanoin sosa partisipasaun iha konsorsiu projetu petroliferu Greater Sunrise ne'e parte husi atividade estadu nian, ne’ebé governu mak simu tarefas sira ne'e, entaun loloos karik Primeiru Ministru, Prezidente Tribunàl tenke hasoru malu kada semana relata serbisu ba Prezidente Repúblika, informa mós ba Prezidente Repúblika. Kona-ba dokumentus legais sira ne'ebé governu halo relasaun ho kazu ida ne'e Prezidente Repúblika presiza hatene," dehan Koordenadór La'o Hamutuk ba jornál INDEPEDENTE iha nia kna'ar fatin, Sesta (26/04).
Tuir Celestino, ba asuntu sosa no fa’an asaun ConocoPhillips no Shell Energy foin nota intendimentu ida (MoU) ne’ebé asina husi Timor Gap ho kompaña rua.
Tan ne’e, nia parte husu mós ba governu atu bele esplika no fó sai kona-ba kontratu sosa no fa’an ne’e iha ona ka lae.
“La hatene loos iha ka lae kontratu (kona-ba sosa asaun). Antes ne’e mós la públika (MoU sosa asaun) tanba ne'e La'o Hamutuk la hatene Prezidente Repúblika iha kopia ka la'e, maibé Lao Hamutuk rasik dala-barak husu ba autoridade sira ne'ebé serbisu iha setór petrolifeira, sira la fó to'o agora,” dehan nia.
"Dokumentus foin lalais ida selu ne'e mós seidauk disponivel iha publiku entaun Prezidente Repúblika hanesan aman ba nasaun, lider ba nasaun tomak nian, presiza akompañia investimentu sira estadu nian.”
Sa tan, nia hatutan, investimentu ida ne'e inklui osan boot, rekursus, no enerjia boot tebes. Tan ne’e loloos Prezidente Repúblika, sosiadade sivil no povu Timor Leste tomak presiza hatene detallu buat hotu-hotu ne'ebé la'o.
Molok ne’e, Prezidente Repúblika (PR) Francisco Guterres Lú Olo deklara to’o agora nia seidauk simu dokumentu ofisial kona-ba Governu Timor-Leste sosa asaun ConocoPhillips no Shell Energy.
PR Lú Olo dehan, to’o agora nia rona de’it informasaun husi media katak governu sosa ona asaun husi kompañia rua ne’e, hodi sai na'in ba proprietária Kampu Greater Sunrise.
Maske nune’e, PR Lu Olo hatete nia orgullu no sei hein governu atu aprezenta dokumentu ba nia.
“Ha'u rona de’it informasaun husi media sira, maibé ha'u la hatene entaun ha'u la halo komentáriu kona-ba ida ne'e, bainhira ha'u rona ona husi dokumentu ofisiál ruma mak ha'u bele ko'alia,” dehan Prezidente Lú Olo ba jornalista sira iha Kristu Rei bainhira partisipa serimónia ANZAC-Day, Kinta (25/4/).
Maske deklara seidauk simu dokumentu ofisial, maibé Xefe Estadu ne’e konsidera akordu sosa asaun ne’ebé governu TL asina ho kompaña Conoco no Shell iha Singapura iha 16 Abril foin lalais nu’udar akordu importante hodi hein prosesu tomak atu dada kadoras mai TL.
“Projeitu ne'e prepara tiha ona iha tinan hirak liu bá, par bele fó benefísiu ba povu. Ha'u hakarak hatete katak ita hein prosesu sira ne'e,” dehan PR Lu Olo.
