Medidas Estadu Emerjénsia Suspende Atividade Missa-Sholat Featured

By Marsu 29, 2020 4097
Bispo Deoseze Dili lidera missa iha festa paskua tinan kotuk. Foto INDEPENDENTE Bispo Deoseze Dili lidera missa iha festa paskua tinan kotuk. Foto INDEPENDENTE

DILI: Governu Timor-Leste liu husi reuniaun Konsellu Ministru iha Sabadu (28/03) deside ona medida hamutuk 19 ne'ebé sei aplika durante periodu estadu emerjensia.

Dekretu Governu ba medidas estadu emerjensia ne'e iha kapítulu 8 ho artigu 33, ne'ebé suspende mós atividade relijjozu missa no suspende atividade musulmanu atu hala’o atividade sholat.

Iha dekretu lei, bandu komunidade katoliku no protestante sira, no komunidade musulmanu atu ba missa no hala’o sholat.

Aliende ne’e, Igreja mós anunsia ona, atu sarani sira la ba ona Igreja hodi halo missa, maibé bele reja de’it iha ida-idaik nia uma hodi hein periodu estadu emerjénsia remata.

Medidas estadu emerjensia ne’e regulariza hafoin, Parlamentu Nasionál (PN), kinta (26/3), aprova ho votus unanimidade a-favor 64, kontra 0, abstensaun 0, no deputadu na’in ida auzensia iha plenaria. Presidente Repúblika Fransisco Guterres Lú Olo dekreta estadu emerjénsia ne’e iha loron 27 fulan-Marsu tinan 2020.

Timor-Leste tenki aplika estadu emerjénsia atu sidadaun hotu-hotu hakmatek ida ida-idaik nia atu nune’e foti asaun luta kontra viruscorona (Covid-19). Ministériu Saúde anunsia katak, ema na’in ida positivu ona ba covid-19.

Estadu Emerjénsia ne’e hahú ona iha loron 28 fulan-Marsu, oras 00.00 too loron 26 fulan-Abril tinan 2020, oras 23:59.

Iha loron dahuluk estadu emeerjensia ne’e aplika, tuir observasaun online INDEPENDENTE ba situasaun einjerál iha kapitál Dili, transporte públiku, mikroleta balun sei halai, loja nesesidade baziku balun, ofisina no loja roupa sei loke. Enkuantu movimentasaun ema ladun maka makaas ona.

Rate this item
(0 votes)
Last modified on Domingu, 29 Marsu 2020 08:49

Independente Digital TV