Marino Enterprise: DNTP La Ónestu Featured

By Martinha Gusmao Setembru 24, 2019 3558
Advogadu kompania Marino Interprice Advogadu kompania Marino Interprice

DILI: Prosesu disputa rai iha Kaitehu ne’ebé sai polémika boot, tanba envolve husi funsionáriu Diresaun Nasionál Terras no Propriedade (DNTP) balun ne’ebé la ónestu.

 

Advogadu Marino Enterprise, Pedro Aparício hateten, problema disputa rai ne’ebé barak akontese iha rai laran tanba hahalok husi funsionáriu DNTP balun ne’ebé hakarak halo komplikadu prosesu hotu-hotu ho intensaun balun.

Iha Terras Propriedade ne’e ita lalika ragukan buat ne’e. Ha’u advogadu dezde tinan 2003 to’o agora ne’e. Memang iha duni servisu máfia. Sé mak dehan la iha?”, dehan nia, iha Tribunál Distritál Dili (TDD), foin lalais ne’e.

Nia fó ezemplu, iha rai ida rezolve hela no Terras Propriedade halo mediasaun, rai ne’e nia estatutu konflitu, maibé husi funsionáriu sira Terras Propriedade fó ba ema arenda, entaun ne’e signifika katak servisu máfia no laiha onestidade.

Ne’e duni, tuir nia, deklarasaun Ministru Justisa ne’e loos, kuaze problema rai iha Timor laran tomak ne’e funsionáriu Terras Propriedade mak halo sai komplikadu.

Maski nune’e, nia dehan, la’ós funsionáriu hotu-hotu iha DNTP, maibé iha ema ida-rua maka komete hahalok ne’e, liuliu ne’ebé asume kargu importante sira balun.

Kona-ba kazu Kaitehu, Pedro dehan, uluk funsionáriu DNTP hatete ba kompañia China Harbour katak, rai ne’e Estadu nian entaun ikus mai Sekretáriu Estadu Terras no Propriedade (SETP) no Ministru Justisa (MJ) tuun direta hodi haree.

Nune’e, sira identifika katak, rai ne’e fahe ba rua. Rai ne’ebé pertense ba fó leten ne’e Estadu nian, no ida seluk iha rai tetuk ne’e rai privadu.

Tanba ne’e, rai privadu ne’e kompañia China Harbour halo kontratu arendamentu ho komunidade hamutuk xefe família 17, maibé lakohi atu halo arendamentu ho kompañia Marino Enterprise, maski estatutu rai ne’e fahe klaru husi SETP no MJ.

Maski estatutu rai ne’e klaru ona, maibé funsionáriu balun iha DNTP hakerek karta ba Gabinete Primeiru Ministru nian katak rai ne’e nafatin pertense ba Estadu nian. Ne’e duni, komplikadu ne’e hamosu husi funsionáriu DNTP rasik.

To’o notísia ne’e hatún, jornalista diáriu ne’e seidauk halo konfirmasaun ba Sekretáriu Estadu Terras no Propriedade (SETP), Mário Ximenes.

Rate this item
(0 votes)

Independente Digital TV