“Kanek” iha Lideransa Komisariu Julio Hornai Featured

By Tomé Amado Marsu 16, 2019 1386
Komandante Jeral sesante Komisariu Julio Hornai ho segundu Komandante Faustino da Costa Komandante Jeral sesante Komisariu Julio Hornai ho segundu Komandante Faustino da Costa

DILI: Sura loron de’it atual Komandante Jeral Polisia Nasionál Timor Leste (PNTL) Komisariu Julio da Costa Hornai sei entrega poder ba Komandante Jeral foun Komisariu Faustino da Costa. Maibé, iha nota balun husi Komisaun A Parlamentu Nasionál ne’ebé sai hanesan “kanek” ida durante Komisariu Julio lidera PNTL.

Komisaun A ne’ebé trata asuntu Konstituisaun no Justisa, fó valor ‘menus’ ba lideransa Komisariu Julio Hornai durante tinan haat, liu-liu kona-ba envolvimentu membru PNTL iha kazu krime.

Komisaun A fó ezemplu hanesan kazu pesoal PNTL tiru-mate joven na’in tolu no na’in lima kanek iha Kuluhun, kazu tiru-mate joven iha Bebonuk, tiru kanek joven iha Pantai Kelapa no kazu seluk tan.

Kazu pesoal PNTL tiru mate joven ida iha Bebeonuk iha 2017 no tiru kanek joven ida seluk iha Pantai Kelapa to’o agora lakon leet de’it.

“Ita mós simu informasaun katak membru polisia barak mak envolve iha kazu krime. Tan ne’e ita husu ba Komisariu foun atu haree kestaun sira ne’e,” deklara Vise Prezidente Komisaun A Francisco de Vasconcelhos ba jornalista sira iha PN, Kinta (14/03).

Aleinde envolvimentu ba kazu krime, deputadu ne’e mós kritika envolvimentu membru PNTL iha grupu artemarsiais.

“Membru (PNTL) balun envolve iha grupu artemarsiais ne’ebé governu taka ona, depois ba sa’e tan sabuk iha Indonezia maibé Komando la halo prosesa hasoru membru sira ne’e,” nia kestiona.

Tan ne’e, Vise Prezidente Komisaun A ne’e hein iha lideransa Komandante Jeral foun, Komisariu Faustino da Costa, sei bele lori instituiusan seguransa ba futuru ne’ebé di’ak liu.

“Ita hakarak lei ne’e tenke sertu mós ba membru (PNTL) sira ne’ebé komete iha krime atu nune’e ita-nia povu bele hatene prosesu kazu ne’e rasik,” dehan nia.

Maske hato’o kritika, maibé deputadu ne’e hatete nia apresia nafatin serbisu Komisariu Julio durante tinan haat nia laran tanba konsege halo mós buat barak.

“Ha’u apresia nafatin Komisariu Julio ninia lideransa durante tinan haat nia laran, nia mós halo buat barak mak di’ak. Ida ne’e ita tenke orgullu,” katak nia.

Maibé, nia hatete, iha dezafiu barak mós ba Komandante Jeral PNTL foun tan ne’e tenke serbisu maka’as no hatudu neutralidade hodi bele haree kazu hirak ne’ebé akontese iha nasaun ne’e, liu-liu iha instituisuan PNTL nia laran.

Alende ne’e Presidenti Komisaun B trata asuntu Defeza no Seguransa deputadu Aderito Hugo da Costa fó parabens ba Instituisaun PNTL ne’ebé liu husi promosaun kareira promove ona ninia komisariu PNTL foun atu lidera Instituisan ne’e ba tinan haat oin mai.

Rate this item
(1 Vote)

Independente Digital TV