Iha Tersa (12/03), insituisaun PNTL aprezenta pakote rua ba kandidatu Komandante Jeral no Komandante Jeral daruak ba Ministru Defeza no Seguransa, Filomeno Paixão. Hafoin, Ministru Defeza no Seguransa deside pakote ida hodi aprezenta ba Konsellu Ministru.

Ho desizaun KM ne’e signifika atual Komandante Jeral, Komisariu Julio da Costa Hornai, tenke husik nia kargu hodi entrega ba atual Komandante Jeral daruak, Komisariu Faustino da Costa ne’ebé eleitu.

Komandante Jeral Daruak PNTL eleitu, Mateus Fernandes daudauk ne’e assume knar nu’udar Komandante Administrasaun PNTL.

Tuir programa, Komisariu Faustino da Costa ho Supertenidente Xefe Mateus Fernandes sei simu pose iha aniversáriu PNTL iha 27 Marsu tinan ne’e hodi lidera PNTL ba period 2019-2023.

Ministru Prézidensial no Konsellu Ministru (PCM), Hermengildo Pereira argumenta katak, Ministru Defeza Filomeno de Jesus Paixão aprezenta rezolusaun ba Konsellu Ministru konab-ba kandidatu foun Komandante Jerál PNTL no Komandante Jerál Daruak.

“Ne’ebé ita hotu hatene katak Konsellu Ministru deside Komisariu Faustino da Costa ho Supertenidente Xefe Mateus Fernandes hanesan Komandante Jerál ho Segundo Komandante Jerál PNTL durante mandatu tinan haat,” dehan Agio ba Jornalista sira iha Palásiu Governu, Kuarta (13/03).

Tuir Agio, KM deside figura na’in rua ne’e lidera PNTL durante tinan haat, tanba sira iha kapasidade atu lidera instituisaun seguransa ne’e.