Kuarta, 21 Agostu 2019 | Login
Soe bebe iha Taibesi. Foto INDEPENDENTE Soe bebe iha Taibesi. Foto INDEPENDENTE

Inan Soe Bebé iha Taibessi Ameasa Prizaun Masimu Tinan 10 Featured

DILI: Inan ida ho inisial LDA ne’ebé soe nia bebé mane iha area Taibessi hetan ameasa pena prizaun tinan 3 to’o tinan 10.

Ministériu Públiku (MP) promove arguida LDA ho krime infantesidu bazeia ba artigu 142 Kodigu Penal ne’ebé hatete “Inan ne’ebé oho nia oan durante partu no kuandu nia sei iha hela partu nia influénsia perturbadora sei hetan pena prizaun tinan 3 to’o tinan 10”.

Polisia Nasionál Timor Leste (PNTL) Munisipiu Dili iha Domingu (04/08) kaptura LDA ne’ebé deskonfia soe nia bebé iha Taibessi. Hafoin kumpri detensaun oras 72, iha Kuarta (07/08), arguida LDA tuir prosesu julgamentu dahuluk iha Tribunal Distrital Dili (TDD).

Tuir informasaun husi ofisial justisa ida ne’ebé lakohi públika ninia identidade, arguida soe bebé iha Tersa (30/07). Enkuantu informasaun husi ofisial polisia ida hatete, durante prosesu investigasaun arguida konfesa katak nia rasik mak oho mate bebé ho meius dulas bebé ne’e nia kakorok.

Iha prosesu julgamentu laran, arguida afirma katak, bebé ne’e ninia oan duni no nia rasik mak oho.

Hatún Dignidade Feto

Entretantu, iha fatin ketak, Ministra Solidariedade Sosiál no Inkluzaun (MSII) Armanda Berta lamenta ho kazu soe bebé ne’ebé ikus-ikus ne’e hahú “buras”.

“MSSI serbisu hamutuk ho uma mahon sira atu haree ba problema ida maibé ho atitude ne’e halo feto iha Timor Leste hanesan laiha dignidade,” dehan ministra Armanda iha palasiu governu, Kuarta (07/08).

Ministra ne’e husu ba inan-aman sira atu kontrola didi’ak nia oan sira hodi labele mete ba hahalok egative ne’ebé ikus mai hamosu kazu soe bebé.

“Hanesan inan ida sujere ba inan-aman sira atu bele haree no kontrolu oan sira hodi labele akontese situasaun sira hanesan ne’e beibeik, tanba bebé ne’ebé soe ne’e inosente, la hatene nia sala,” dehan nia. Maske nune’e, nia dehan, problema soe bebé ne’e la’os de’it feto nia kulpa, maibé mós mane.

Read 499 times
Rate this item
(0 votes)
MidAd1