“Pozisaun FRETILIN, kualker tempu prontu atu halo dialogu, labele alerjiu maibé tenke nakloke hodi ko’alia ba malu tanba ida ne’e interse nasionál,” deklara Vise Prezidente Bankada FRETILIN Francisco Miranda Branco iha PN, Kuarta (07/08).

Maibé, deputadu husi Bankada KHUNTO Luis Roberto hatutan, bainhira mosu ona dialogu imposivel atu la koalia kona-ba fahe kadeira iha governasaun.

“Dialogu tama ona iha partidu politika imposivel la fahe kadeira. Igreja mak ko’alia (la fahe kadeira) ne’e loos, maibé kria partidu politika ida la hanoin fahe kadeira ne’e bosok,” dehan nia.

Hatan ba ida ne’e, Vise Prezidente Bankada FRETILIN Francisco Miranda Branco hatete, alternativu atu rezolve inserteza politika mak tenke liu husi dialogu maibé la signifika atu fahe kadeira.

“Ita labele intepreta katak kondizizu atu fahe kadeira ba malu entre orgaun partidu hotu-hotu,” dehan nia.

Iha fatin hanesan, Deputadu Bankada Partidu Demokratiku (PD) Adriano do Nascimento konsidera dialogu sai nu’udar dalan ne’ebé di’ak no importante atu rezolve problema.

“So dalan dialogu, maibé katuas sira hafuhu malu, lakohi rezolve problema,” dehan nia.

Tuir nia, ida ne’e akontese tanba egoizmu husi lider politiku AMP sira, tanba to’o oras ne’e membru governu seidauk komletu.