Sexta, 24 Janeiru 2020 | Login
Inundasaun iha Ponte Leste tinan 2019 Inundasaun iha Ponte Leste tinan 2019

Governu Pendente Apoiu Emerjensia ba Uma-kain 3.098 Featured

DILI: Dezastre naturais ne’ebé akontese durante tinan 2018 to’o 2019 rezulta uma-kain 6.796 mak sai vitima. Husi númeru ne’e, uma-kain hamutuk 3.698 mak hetan ona apoiu emerjensia, enkuantu apoiu emerjensia ba uma-kain 3.098 seluk sei pendente hela.

Sekretariu Estadu Protesaun Sivil Alexandrino Xavier de Araujo informa, iha tinan kotuk akontese bailoron naruk ne’ebé provoka anin boot no ahi estraga komunidade lubuk ida nia hela fatin no sasan sira seluk.

Hafoin ultrapasa situasaun ne’e, nia dehan, mosu udan boot ne’ebé rezulta mós komunidade lubuk ida mak sai vitima.

“Agora dadaun dadus ne’ebé mak iha Temor Leste ahi haan no udan boot estraga uma ne’e ita iha dadus hamutuk Xefe Familia 3.698 ne’ebe mak ita responde ona, no balun sei pendente no seidauk responde hamutuk 3.098 Xefe Familia. ne’e inklui mós dadus balun iha Munisipiu Dili nian hanesan Postu Atauru mak seidauk,” deklara Sekretariu Estadu ne’e iha nia knar-fatin, Kinta (09/01).

Nia hatutan, SEPS sei pendente apoiu emerjensia balun ba vitima sira tanba sira-nia dadus seidauk tama ba sistema.

“Kazu balun 2018 to’o 2019 nian seidauk tama iha sistema,” informa Alexandrino.

Maske dadus husi kazu ne’ebé akontese kleur ona seidauk tama sistema, maibé, nia hatete, ba kazu inundasaun ne’ebé iha tinan 2019 nia rohan akontese iha Manleuana, Munisipiu Dili, ne’ebé rezulta uma-kain 225 sai vitima, hetan ona apoiu emerjensia, tanba sira-nia dadus tama ona sistema.

“Ida foin dadauk iha dia 29 de Dezembru (2019) ida ne’e tama ona iha sistema hanesan iha Manleuana uma ne’ebe mak afetadu ba dezastre naturais hamutuk 225, ida ne’e ita fó ona apoiu emerjensia”.

Apoiu emerjensia ne’ebé SETP oferese ba vitima sira mak hanesan foos, supermi, ikan lata, no aihan seluk ne’ebe mak presiza, aleinde ne’e apoiu mós sanan, bikan, lona no seluk tan.

Read 229 times
Rate this item
(0 votes)

About Author

MidAd1