Sábadu, 07 Dezembru 2019 | Login
Id Facebook Deputadu husi PLP Sabino Soares “Guntur” Id Facebook Deputadu husi PLP Sabino Soares “Guntur”

“Goblok” husi Guntur ba PR Lu Olo sai Naruk Featured

DILI: Lia-fuan ne’ebé deputadu Sabino Soares “Guntur” hasai liu husi media sosial Facebook sai naruk. Bankada FRETILIN iha Parlamentu Nasionál ezije ba deputadu PLP ne’e atu husu deskulpa.

Iha facebook ho ID “Guntur Matebian Timur” nu’udar ID husi atual deputadu PLP Sabino Soares “Guntur” hakerek lia-fuan “goblok” ne’ebé refere ba PR Lu Olo relasiona ho lista indultu ne’ebé governu aprezenta.

Iha varanda FB, deputadu Guntur hakerek ho letra boot hotu: “Sekarik disisaun presidente ba koruptores ida ho direitus humanus sein hare ba presuisu ba valor materialismo estadu, hodi implika prosesu libertasaun nasional hodi konsolidasaun independensi ne mos presidente goblok ida hotu”!.

Lia-fuan ne’ebé kompleta ho foto Prezidente Repúblika Francisco Guterres Lu Olo no foto komunidade balun hiit karon ne’e utulizadór FB balun screenshot no fahe tutan.

Utulizadór FB barak mak lamenta ho lia-fuan husi deputadu PLP ne’e tanba konsidera laiha etika.

Iha Segunda (13/05) liu husi plenaria Parlamentu Nasionál, Bankada FRETILIN kondena deputadu Guntur tanba hasai lia fuan “Goblok” ba PR Lu Olo.

Deputadu Bankada FRETILIN, Antoninho Bianco hatete, FRETILIN la simu deputadu PLP ne’e hasai lia fuan goblok ba xefe estadu.

Nia dehan, FRETILIN defende xefe estadu ne’e laos tanba nia mai husi partidu FRETILIN maibé tanba nu’udar Prezidente ba povu tomak.

“Ita-boot brani ona hatete aat Prezidente (Repúblika) ho lia-fuan mal. Ida ne’e mak ami lakohi duni no laiha duni fatin ba rai ida ne’e,” dehan deputadu Antoninho iha plenaria PN.

“Ita-boot brani demais ona maibé brani ne’e laiha etika no la tuir koridor. Loloos ne’e ita-boot mak goblok tanba la hatene regras oinsa atu uza media sosial”.

Iha fatin hanesan, deputadu Sabino Soares Guntur hatete, ID ho naran Guntur Matebian Timur ne’e ninia ID duni, laos ID falsu.

Deputadu ne’e konsidera nia nu’udar mane tan ne’e halo kritika ho nakloke ba xefe estadu.

“Ema ne’ebé halo kritika ba PR ne’e laos ID falsu maibé ha’u duni mak halo kritika ne’e. Saida mak ha’u fó sai ne’e ha’u hatene nia (PR) komprende liu”.

Deputadu ne’e hatete, nia prontu atu responsabiliza ba aktus ne’ebé nia halo hasoru PR.

“Ha’u mak sei responsabiliza saida mak ha’u halo no ha’u sei la tula todan ba ema seluk,” dehan nia.

Read 914 times
Rate this item
(0 votes)
MidAd1