Sábadu, 07 Dezembru 2019 | Login
Ilustrasaun moras fuan. Foto google Ilustrasaun moras fuan. Foto google

Fulan 3, HNGV Rejista Na’in 1.332 Sofre Moras Fuan, 22 Mate Featured

DILI: Tuir dadus husi Hospital Nasionál Guido Valadares (HNGV) iha fulan tolu nia laran, Juñu to’o Agostu, ema na’in 1.332 mak hala’o tratamentu saúde tanba moras fuan. Husi númeru ne’e, na’in 22 mak la konsege hetan salva.

Médiku Espesialista Kardiolojia HNGV Cesaltino Leão hatete, pasiente sira ne’ebé mak kauza moras fuan mai konsulta Kardiolojia ba fulan Juñu nian hamutuk na’in 360, fulan Jullu hamutuk na’in 538, no fulan Agostu hamutuk na’in 438.

“Pasiente ne’ebé sofre moras fuan husi fulan Juñu to’o Agostu hamutuk na’in 1.332, husi pasiente ne’e na’in 22 mak serangan jantung, mate, husi idade tinan 42 ba leten,” informa mediku espesialista ne’e iha HNGV, Sesta (13/09).

Ba kauza husi moras fuan ne’e, Cesaltino dehan, pasiente balun dala-ruma moris mai sofre kedan moras ne’e tanba durante nia inan isin-rua la halo kontrolu rutina ba nia saúde.

“Dala-ruma kauza ne’e mai husi fuma sigaru sira ne’e no hemu alkohol no mós tensaun aas la kontrola bebeik, tuur iha fatin la book an, nunka halo ezersisiu, tanba ne’e bele afeita hetan moras fuan hodi ataka kardíaku (serangan jantung),” esplika mediku espesialista ne’e.

Tan ne’e, nia dehan, ema ida-idak presiza iha konsensia hodi bele halo prevensaun ba moras ne’e.

“Husu mós ba inan isin-rua sira tenke halo prevensaun ba moras fuan, durante isin-rua, inan sira tenke kontrola beibeik ba sentru saude sira ne’ebé besik,” dehan nia.

Ba pasiente sira ne’ebé deteta ona moras fuan, nia husu atu tenke halo tuir reseita ne’ebé doutór fó nune’e bele rekupera.

“Ezemplu mak doutor bandu dehan labele fuma no hemu tua tenke halo tuir hodi nune’e halo tratamentu ne’e bele hatene sinal rekupera sira,” dehan nia.

Ba tratamentu iha HNGV, nia dehan, daudauk ne’e so bele fó de’it aimoruk, no seidauk bele halo operasaun ba fuan tanba seidauk iha espesialista ba area ida ne’e.

Read 641 times
Rate this item
(0 votes)