Domingu, 26 Maiu 2019 | Login
Karreta Estadu. FOTO: dok Karreta Estadu. FOTO: dok

‘‘Prende’’ Karreta Estadu, Arguidu Hetan Ameasa Prizaun Tinan Haat Featured

DILI:  Iha alegasaun finál husi Ministériu Públiku ameasa pena prizaun tinan haat efetivu  ba Arguidu Eis Funsionáriu Públiku ida ho inisiál JBFAC tanba prova aprovadu la entrega karreta estadu, maski nia hetan ona demisaun ba kazu indisiplinar husi Komisaun Funsaun Públika (KFP).

Ministériu Públiku akuza arguidu na'in rua ba krime borla agravadu.

MP husu ba Tribunál atu aplika pena prizaun ba arguidu JBFAC tinan haat efetivu no ba Arguida MC aplika pena tinan ida suspende ba tinan ida.

Tanba arguida MC asina karta autorizasaun atu karreta para nafatin iha arguidu JBFAC nia uma.

Sasin  ho inisiál AP nu'udar Diretór Jerál Ministériu Edukasaun deklara tuir lei  Komisaun Funsaun Públiku ema ne’ebé hetan demisaun karreta tenke entrega ba ministériu, la’ós lori ba para iha uma.

Nia dehan, arguidu lori duni karreta ne’e ba para iha nia uma.

 “Iha prosesu demisaun nia laran arguidu la entrega karreta mai iha Ministériu, maibé para iha nia uma,”dehan sasin iha sala Julgamentu-TMD, Horisehik.

Nia dehan, arguidu JBFAC hetan fiar hodi assume kargu importante ida iha Institutu Nasionál Siénsia Teknolojia (INCT) Ministériu Edukasaun (ME) iha 1 Outubru 2014.

Ho serbisu ne’e, ME entrega karreta ho marka Toyota Prado ho xapa matrikula 04 584 G ba arguidu atu bele fasilita ninia serbisu.

Iha 20 Jullu 2016, KFP foti desizaun hodi demite arguidu JBFAC husi funsionáriu públiku tanba komete kazu disiplinar. Hafoin iha Outubru 2016, arguida MC hetan nomeiasaun hodi substitui arguidu JBFAC.

KFP hasai desizaun ida ne’e relasiona ho desizaun Tribunál Munisípiu Dili (TMD) iha 1 Marsu 2016 ho númeru prosesu 0521/14 PDDIL ne’ebé kondena arguidu JBFAC ba krime administrasaun danoza, pekulatu, falsifikasaun dokumentu ka notasaun tékniku ho pena prizaun tinan 3. Maibé, tribunál suspende tiha ho kondisaun atu halo pagamentu ho montante $3,399.00.

Hafoin hetan karta demisaun, arguidu lori fila karreta estadu ba uma no la entrega to’o ekipa husi Komisaun Anti Korrupsaun (KAK) ba diretamente iha arguidu nia uma hodi foti karreta refere.

Entretantu, Defeza husi Arguidu JBFAC  husu ba Tribunál atu absolve tanba iha akuzasaun la tau prejuizu  no   gasta osan hira.

Defeza husi arguida MC husu ba Tribunál atu aplika pena adekuadu no justu ba arguida, tanba karreta  la’ós ba para iha arguida nia uma.

Hafoin rona parte rua, Tribunál deside adia julgamentu ba fali loron seluk hodi rona desizaun finál.

Read 647 times
Rate this item
(0 votes)