Anto sente nervozu la’os tanba Marta husu osan maibé tanba Marta husik hela sira-nia oan iha Ermera ho nia avo.

Liu husi prosesu julgamentu iha Tribunal Distrital Dili, Ministériu Públiku (MP) akuza arguidu (Anto) komete Krime Ofensas Integridade Fiziku Simples konjuje ho Violensia Domestika ne’ebé previstu iha artigu 145 Kodigu Penal.

Tuir akuzasaun, iha 16 Novembru 2012 tuku 8 kalan iha Komoro, lezada (Marta) husu osan ba arguidu atu ba haree sira-nia oan iha Ermera. Arguidu hasai liafuan at ba lezada, hamrik hodi tuku lezada iha ulun dala haat, basa iha hasan dala rua, rasta nia fuk to’o monu ba rai, hafoin foti aisuak hodi sona nia liman loos.

Hatan ba akuzasaun ne’e arguidu deklara katak faktus ne’e loos hotu.

“Tanba lezada ba Ermera lori ha’u-nia oan feto ba, depois nia fila la lori labarik ne’e, tanba ne’e mak ha’u nervozu hodi baku ne’e,” dehan arguidu iha sala audensia TDD, Kinta (18/05).

Iha fatin hanesan, lezada rekoñese katak iha altura ne’e arguidu tolok, tuku, basa no lori asuak sona nia liman tanba nia la lori fila labarik.

“Ha’u lori labarik ba Ermera, nia avo sira haruka dehan hela, depois ha’u mesak mak fila mai, ne’e mak nia nervozu hodi baku ne’e,” dehan lezada.

Rona deklasaun husi parte rua Tribunál husu PM atu submete kedas ba alegasaun. Liu husi alegasaun MP husu ba Tribunál aplika pena administrasaun ba arguidu tanba arguidu konfesa katak nia baku duni lezada.

Entretantu, parte defeza husu ba Tribunál atu aplika pena ne’ebé adekuadu tanba haree mós arguidu nia kondisaun.

Iha ninia desizaun final, Tribunál kondena arguidu ho pena administrasaun no husu ba arguidu atu labele repete tan hahalok hanesan iha futuru.