Kuarta, 17 Jullu 2019 | Login
Ilustrasaun laen baku feen. FOTO: APAV Ilustrasaun laen baku feen. FOTO: APAV

Autor Violensia Domestika Hetan Pena Suspensaun Tinan 3 Featured

DILI: Tribunal Distrital Dili iha ninia desizaun final hamonu pena prizaun tinan 3 suspende ba tinan tolu ba arguidu Tonito Soares ne’ebé sai autór ba kazu violensia domestika hasoru nia feen.

Tribunál iha ninia deklarasaun hatete faktu iha akuzasaun laran provadu hotu. Katak lezada nia deklarasaun ne’ebé hatete arguidu baku lezada hafoin lezada sai husi haris-fatin tanba labarik tanis loos duni.

Juiz dehan ba arguidu katak, durante tinan tolu nia laran arguidu labele halo krime ruma, hasoru ema seluk ka nia feen ho oan.

Molok ne’e, Ministériu Públiku iha ninia akuzasaun deklara iha 7 Janeiru 2018 tuku 02:00 madrugada iha sira-nia hela-fatin, Bazartete-Likisa, lezada sai husi haris-fatin no rona sira-nia oan tanis. Lezada tama ba kuartu laran no husu ba nia laen tanba sa mak la haree labarik ne’ebé tanis.

Arguidu la hatan lia-fuan husi nia feen ne’e ho ibun, maibé nia hiit liman hodi tuku lezada nia matan-fukun parte kuanan. Tanba sente moras, lezada mós reajen no tuku hasoru nia laen.

Reasaun husi lezada ne’e halo arguidu raan nakali liu tan no nia halai sai hodi ba foti katana ho intensaun atu oho lezada, maibé la konsege tanba arguidu nia inan-aman hadau katana husi arguidu nia liman. Lezada halai no ba toba iha viziñu nia uma.

Iha 8 Janeiru tuku 6:00 dader, arguidu ba fanu lezada iha viziñu nia uma. Arguidu tebe dala rua iha lezada nia kotuk laran. Ho hahalok ne’e iha loron ne’e kedan lezada ba hato’o keixa iha Polisia Eskuadru Bazartete.

Read 1286 times
Rate this item
(0 votes)