Vise-Presidente CNE, Duarte Tilman hatete, órgaun eleitorál tenta servisu hamutuk ho entidade hotu-hotu atu lori susesu ba eleisaun antesipada ne’e.

Antes atu tama ba kampaña eleitorál, semana ne’e nia laran partidu polítiku hotu tenke hatama ona sira nia oráriu kampaña atu bele verifika fali.

CNE iha ona lei eleitorál ne’e sai hanesan regra ba partidu hotu-hotu tenke submete.

Iha regra sira mak hanesan kampaña eleitorál sei hahú husi tuku 08:30 dadeer to’o 18:00 lokraik. Labele envolve labarik sira, kampaña tenke dook husi edifísiu públiku, kampaña remata partidu sira iha obrigasaun tenke hamoos sira nia atributu ne’ebé taka iha dalan.

Durante iha kampaña eleitorál mak militante partidu sira tenta halo krime eleitorál ho fíziku ne’e individualmente tenke responsabiliza nia aktu. CNE sei la fó sansaun ba partidu, maibé entrega diretamente ba polisia mak prosesa tuir kazu ne’ebé ema ne’e komete.

Partidu polítiku sira envolve labarik iha kampaña eleitorál ne’e CNE servisu hamutuk ona ho Komisaun Nasionál Direitu Labarik (KNDL) sei tau matan no bainhira utiliza karreta Estadu ruma ne’e kompeténsia ba KAK no PDHJ sira atu hala’o nia funsaun.

Maibé, hanesan krime adminitrativamente, liu-liu hanesan partidu sira liu tiha eleisaun la hamoos sira nia atributu ne’e sira tenke multa, bainhira eleisaun hotu governu reembolsu osan sira ne’ebé gasta iha kampaña CNE sei ko’a.

Iha fatin hanesan, Komandu Operasaun Nasionál PNTL, Superintendente Xefe Henrique da Costa hatete, regulamentu ba kampaña eleitorál preve ona iha lei eleisaun. Tanba ne’e, kuandu partidu polítiku sira la kumpre regra ne’ebé iha ona sei servisu hamutuk ho CNE atu foti medida.

“Lei hatete ona regra kampaña tuku 08:30 dadeer to’o 18:00 lokraik, maibé kuandu liu ida ne’e sei halo nafatin ami sei servisu ho CNE haruka sira fila. Maibé kuandu sira kontinua ami sei hapara ka halo kapturasaun tanba prosesu hirak ne’e iha hotu ona Polisia nia liman atu ezekuta orden”, dehan nia, iha salaun MSS, horisehik.

Bandu Uza Motór Kanu Racing iha Kampaña

Nune’e, atu prevene asidente no krime eleitorál iha kampaña eleitorál, PNTL aviza ba públiku kuandu iha tempu kampaña militante no simpatizante sira viola kódigu estada sei prende sira nia motorizada.

“Ita la tolera ema sira ne’ebé uza motór kanu racing, motór ida tula ema na'in tolu, la taka kapasete no karta kondusaun laiha maibé halo konvoiu iha kampaña ami sei prende no ida ne’e ha'u la tolera”, Superintendente Xefe Henrique.

Iha kampaña Parlamentár no Prezidensiál tinan kotuk nian, motorista sira uza motór kanu racing hodi baralla ema nia konsentrasaun atu rona kompromisu eleitorál husi partidu ba nia eleitór sira.

Atu minimiza aktu hirak ne’e halo ona soru-mutu ho lider partidu polítiku sira hodi diskute dezafiu hirak ne’e atu bele prevene aktu hanesan ne’e labele repete hikas iha eleisaun antesipada mai.

Atu prevene aktu ne’e sosiedade sivíl hamutuk ho órgaun xave sira asina ona paktu prevensaun krime iha eleisaun antesipada atu labele mosu erru iha festa demokrasia ida ne’e.

Henrique esplika, oras ne’e daudaun PNTL liu husi komandu operasaun hetan apoiu husi F-FDTL halo ona preparasaun ne’ebé másimu atu garantia seguransa iha Kampaña no eleisaun mai.

Iha eleisaun antesipada ne’e tuir STAE sei estabelese sentru votasaun hamutuk 843 iha territóriu laran tomak tanba ne’e Polisia sei koloka nia ajente na'in rua iha kada estasaun votu.