“Ita monta hotu ona parkir rodoviária ba karreta no motór sira ne'ebé sei para iha ne’ebá. Transporte sira sei selu tuir karcis (billete) ne'ebé mak iha. Ita sei hahú uluk husi Kolmera no Merkadu Taibessi”, dehan Adjuntu Autoridade Munisípiu Dili, José Smith, iha salaun Ministériu Solidariedade Sosiál (MSS), horisehik.

Parkir rodoviária ne’e sei selu tuir medida transporte kada oras hahú husi sentavu $0.25 to’o 0.75.

Lansamentu ba implementasaun ne’e hala’o ona no hein de’it pesoál estasionamentu sei tuir formasaun iha semana ne’e no semana oin komesa aplika polítika ne’e.

Nia esplika, osan husi rodoviária ne’e sei hatama ba banku tuir osan ne'ebé motorista sira selu. Osan sira ne’e sei tama ba orsamentu munisipál nian.

“Se ida ne’e mak funsiona hotu iha munisípiu sira ba futuru sei la depende tan ba governu sentrál”, tenik José.

Nia mós garante katak, husi implementasaun primeira faze rodoviária iha área Kolmera no Taibessi. Faze tuir mai sei haree ba iha área Parlamentu Nasionál nian.

Kona-ba sosializasaun, nia dehan, la’o hotu ona no ba oin parkir rodoviária sei haluan tan.