Konsellu Ministru deside la halo aprovasaun ruma maibé haruka fali-fali ba UNTL hodi foti desizaun ba númeru estudante ba rejime espesiál kanál B nian.

Númeru estudante ne’ebé atu asesu tama ba UNTL sa’e makaas ho totál ema 7.032. Ne’e duni, mosu kontradisaun ideia entre Governu no universidade.

Nune’e, deside levanta kazu ne’e ba Konsellu Ministru, maibé labele halo aprovasaun ba rezolusaun no entrega hikas ba universidade atu bele tetu no deside.

“Konsellu Ministru rasik la aprova rezolusaun no aprezenta panorama jerál rejime jerál husi UNTL sira”, dehan Ministru Edukasaun Ensinu Superiór, Longuinhos dos Santos, hafoin partisipa Konsellu Ministru, iha Palásiu Governu, horisehik.

Nia dehan, Governu ho universidade preokupa tebes prosesu aprendizajen iha UNTL rasik daudaun ne’e atraza hela, tanba situasaun ne’e sei buka solusaun atu rezolve lalais hodi aselera prosesu iha UNTL.

Tanba ne’e, UNTL sei koordena ho MEESSK atu buka dalan foti desizaun ultrapasa lalais situasaun ne’e atu estudante sira labele difikulta prosesu aprendizajen no estudante sai vítima ba impase desizaun asesu ba UNTL nian.

Estudante sira ne’ebé pasa hodi asesu ba UNTL iha tinan akadémiku 2019 liu husi rejime jerál (kanál A) no rejime oportunidade (kanál C) hamutuk estudante 2.986 no rejime espesiál (kanál B) hamutuk 7.032.

Nune’e, bainhira universidade aprova rejime espesiál ne’e maka estudante ne’ebé sei asesu ba UNTL iha tinan ne’e hamutuk 10.018.