Primeiru Ministru, Mari Alkatiri hateten, karreta estadu ne’ebé instituisaun Estadu sosa barak maibé laiha funsaun. Ne’e duni, sei halo levantamentu ba operasaun karreta nian iha kada instituisaun, bainhira la nesesáriu atu uza ka la utiliza bele transfere ba parte PNTL.

Tuir nia, difikuldade boot PNTL sira iha munisípiu, bainhira halo operasaun susar tebes tanba laiha karreta. Tanba ne’e, VII Governu hakarak rekolla hotu patrimóniu estadu.

“Polisia agora laiha karreta, ami halo hela levantamentu patrimóniu estadu nian, nune’e karreta estadu balun ba Polisia”, dehan PM Alkatiri, iha Bairru-Formoza, Dili, Kinta (9/2).

Nia dehan, karreta estadu oras ne’e sirkula iha sidade barak demais no la halo servisu, kuandu tempu feriadu veíkulu ho marka estadu ba tranka hotu iha tasi ibun.

Nune’e, iha ministériu sira karreta para hanesan armazein maibé laiha funsaun, tanba karreta balun halo privatiza fali hodi lori ba uma la halo buat ida.

Tan ne’e, VII Governu konstitusionál halo levantamentu patrimóniu estadu hodi rekolla hotu karreta sira hodi entrega ba seguransa hodi uza ba operasaun.