Ministru António hato’o mensajen ne’e durante selebra natál no tinan foun 2017 hamutuk ho funsionariu.

Nia husu atu funsionariu sira konsolida nafatin pás iha Timor-Leste. Tanba papél ne’ebé Igreja sira hala’o importante tebe-tebes, tanba Timor maiória reliajiaun Katolika, maibé komunidade protestante mós istorikamente sira ejiste ona.

“Iha tinan 2017 ita tama ba iha eleisoens, Igreja Katolika no Protestante papél importantete atu konsensializa ita nia povu sira atu kria hakmatek hodi nune’e lori dezenvolvimentu mai Timor-Leste,” tenik nia hatenik nia ba jornalista iha salaun Don Bosco Komoro Dili, Sesta (06/01),

Nia dehan, festa natál no tinan foun 2017 halo nu’udar pasu importante ida hodi tuur hamutuk halo refelesaun atu kontinua servisu ho di’ak  liutan.

“Ami hanoin atu halo atividade festividade natál ninian, fó atensaun liu atu selebra entre reliajiun Katolika ho Protestante  ne’e primeira ves ita halo atividade ne’e hodi bele lori reliajiaun rua ne’e tuur hamutuk para halo reflesaun,” tenik nia.

António dehan, problema sosiais ne’ebé akontese iha Timor-Leste barak hanesan, ema soe oan, ema tara an, ema oho malu no ema halo violensia iha fatin hotu-hotu ne’e mai husi graduasaun morál. Tanba fraku husi ema ninia fiar rasik no lakon espiritu solidariedade ba malu. 

Tanba ne’e, Igreja Katolika no Protestante kaer papél importante para atu fó nafatin morál ba ema hodi ne’ebé kaben labele soe malu no sira ne’ebé hola malu tenke responsabiliza ba hahalok para labele soe bebe.

Nia hatutan, iha sosiedade ema moras barak tanba ambiente ne’ebé seidauk iha konsiensia, tanba ne’e hakarak atu involve Igreja rua para dezempeñia papél ida hodi nune’e bele ajuda sosiedade. 

Aleinde ne’e, nia afirma, espetativa mak selebrasaun natal no tinan foun bele sai eventu ida para atu halo reflesaun ba saida mak sira liu ona iha tinan 2016 kotuk. 

Nia informa, funsionáriu sira halo servisu tenke badinas ou kompromitidu, tanba ne’e labele hanoin de’it nivel ou kargu ne’ebé iha. Maibé importante liu mak fó dispozisaun atu bele servi ema seluk. Ne’e duni bainhira servi ema seluk hola duni knar ho responsabilidade. Tanba ne’e labele abandona servisu no husik ema seluk ninia proposta ou pedidu sira, ne’e duni funsionariu sira rasik labele ignora.

Nia salienta, tinan ne’e bele iha miloramentu no prestasaun servisu ba públiku no iha planeamentu ne’ebé di’ak no konsistensia ba implementasaun planu hirak ne’e.