Hahú kedas husi inísiu kampaña ida-ne'e, SEATOU nia asaun sira provoka debate no fahe opinaun públika. Iha parte ida, sidadaun sira ne'ebé apoia SEATOU konsidera estrutura informál no vendedor sira tenke hasai tanba sira hamosu macet, fakar lixu arbiru no kontribui ba kondisaun ne'ebé la ijiéniku iha fatin públiku. Sira konsidera Governu nia programa ne’e nesesáriu hodi hametin orden, seguransa no limpeza. Ema balun hakarak Governu implementa medida forte tanba sira konsidera Timor-oan sira “ulun to’os”, nune’e tenke uza violénsia ka ameasa, se la’e, ema sei la rona.

Perspetiva hirak-ne'e mós rezulta husi realidade iha ne’ebé ema rihun-ba-rihun okupa rai sein autorizasaun, liu-liu durante tempu konflitu hanesan iha tinan 1999 no 2006. Movimentu ema sira ne'e ne'ebé la kontrola hamosu disputa rai barak, ne'ebé kontinua provoka konflitu sosiál no kazu tribunál barak to'o ohin loron. Tanba ne'e, ema barak hare’e importante tebes atu hasai tiha ema ne'ebé okupa rai sein hetan autorizasaun.

Iha parte seluk, ema barak la konkorda ho SEATOU no Governu nia aprosimasaun iha programa ne’e. Maske maioria rekoñese katak vendedor no populasaun sira ne'ebé halo uma iha rai estadu viola duni lei, sira foti pozisaun dehan estadu nia hahalok brutal liu bainhira hasai ema no sobu uma, nune’e hamosu violasaun direitus umanus no konflitu sosial. Ema barak tan sente triste hare’e estadu nia hahalok ne’ebé agresívu liu kontra sira nia maluk sira, ema ne'ebé hasoru situasaun difisil no tenta de’it atu buka moris no hela fatin.

FM rekoñese katak problema oi-oin mosu bainhira ema halo konstrusaun informál, okupa rai ilegál no fa'an iha dalan sein autorizasaun. Maibé, ami preokupa tebes kona-ba SEATOU nia hahalok durante ne’e. SEATOU hamutuk ho membru PNTL balun komete violénsia kontra ema baibain, no hatudu tendénsia ditadura no la konsidera ema nia direitu nu’udar ema. Violénsia ne’e halo ema kanek no kontra dignidade, maibé mos amease estabilidade sosiál no hafraku estadu nia lejitimidade.

Diksursu públiku ne'ebé justifika estadu nia violénsia mós halo ami preokupa tebes. Bainhira ema justifika estadu uza violénsia kontra povu tanba " sira sei la rona", ne’e kontra prinsípiu Repúblika Demokrátika ne’ebé tuir lolos bazeia iha estadu de direitu no respeita dignidade ema ida-idak. Bainhira Timor-oan koalia hanesan ne’e, ami hanoin hikas fali ba ditadura militár Indonesia nian, estadu ida ne'ebé justifika violénsia no brutalidade maibé bolu fali orden no estabilidade. FM preokupa bainhira ema normaliza violénsia husi estadu atu impoin orden, tanba ne’e estabelese padraun negativu ba futuru relasiona ho interasaun entre estadu no sidadaun sira.

Ba FM, SEATOU nia kampaña ne’e hatudu klaru katak governu sira falla atu responde ba huun ka abut informalidade no prekaridade iha rai ida ne'e. Hanesan FM hakerek ona, ema fa'an iha estrada, okupa rai ilegál, no problema sira seluk ne’ebé mosu tanba prátika refere, ne’e sintoma problema estruturál sira – liu-liu ekonomia no sosiedade ne’ebé seidauk modernizadu. Dezde independénsia to’o agora, polítiku la konsege aselera prosesu modernizasaun liu husi investe iha rekursu umanu, infraestrutura bázika, dezenvolvimentu industriál no sistema no teknolojia xave sira hanesan jestaun lixu, telekomunikasaun no e-governasaun. Sira konsentra liu ba kompetisaun podér, ataka no hadau malu, no bainhira ka’er podér, sira implementa mega-projetu ka projetu seluk ne'ebé hariku elite sira no sosa apoiu polítiku.

SEATOU nia kampaña mós reflete elitizmu no inkonsisténsia iha governasaun Timor-Leste nian dezde independénsia. Maske FM repete beibeik ida ne’e, ami hakarak repete tan: SEATOU implementa "lei no orden" ho agresivu tebes, maibé elite sira kontinua moris iha impunidade nia laran. Estadu duni no baku ema baibain sira, sobu uma ki’ak sira nian, no prende vendedor ki’ik nia sasán, maibé kuandu ema bo’ot halo krime grave sira hanesan korrupsaun bo’ot ka rai kilat ilegal, la iha konsekuénsia. Aleinde ne'e, prátika a’at sira hanesan halai kareta arbiru, soe fo'er arbiru, halo konstrusaun ne’ebe la tuir padraun no ema halo barullu hanesan akontese lor-loron iha komunidade barak. SEATOU gasta rekursu barak atu duni vendedor sira no sobu uma iha “rai estadu”. Maibé to'o agora Governu seidauk rezolve problema sosial sira temi iha leten. Nune’e mos, Governu seidauk kira mekanizmu ida ba komunidade atu bele hato'o keixa kona-ba prátika anti-sosial sira hanesan barulla, sunu lixu, no halai kareta arbiru, maske prátika sira ne’e ameasa seguransa públika no saúde grave liu duké ema fa'an iha estrada ninin.

FM haree diferensa bo’ot entre krime ne'ebé ameasa direta ema seluk, hanesan halai kareta arbiru, na'ok ka violénsia ruma, no "krime" sira hanesan halo uma sein regulamentu ka fa'an iha estrada. Prátika informal sira ne’e buat baibain iha nasaun sub-dezenvolvidu sira iha ne’ebé estadu direitu sei fraku. Iha kontextu hanesan Timor-Leste, bainhira estadu kriminaliza fali ema sira ne'ebé envolve iha atividade informál sira ne'ebé dala barak rezulta husi nesesidade ekonómika, ne’e la produtivu, la justu, no kontra ema nia dignidade. Karik Governu hakarak redúz prátika informál sira, tenke dezenvolve setór formál hodi kria oportunidade empregu lejítimu no haforsa regra no prosedimentu formál sira iha nível sosiedade hotu, inklui iha estadu rasik. FM nota katak informalidade la eziste de’it iha estrada, merkadu ka bairro sira – informalidade mos buras iha administrasaun públika. Ezemplu, atu trata dokumentus dala barak ita presiza koneksaun iha laran atu ajuda, se la’e susar atu hetan atendimentu iha tempu badak. Realidade ida ne'e hatudu katak imposível ba estadu atu halakon atividade informál sira liu husi uza forsa fízika bainhira prátika informál sei domina iha sosiedade laran tomak, inklui iha administrasaun públika rasik. Atu bele redúz prátika informál sira no hametin estadu de direitu, Governu la bele duni ema no sobu uma – tenke adopta aproximasaun ne’ebé kumpriensivu hodi mellora fatór sistémiku ka estruturál sira.

Infelizmente, SEATOU nia hahalok antes Papa Francisco vizita Timor-Leste indika katak polítiku sira hakarak de’it hatudu imajen ne’ebé “moos” ba mundu, duké foka ba huun kiak no informalidade iha rai ida ne’e. Ne’e la’os buat foun iha Timor-Leste – uluk Governu halo hanesan antes simeira CPLP 2016 iha Dili, no uza violénsia hodi hasai vendedor informál sira atu hatudu imajen “orden” no “modernu”. Governu duni sai vendedor ambulante no merkadu informál sira, maibé sira sempre mosu fali iha fatin ne'ebé hanesan. Realidade ne’e hatudu katak medida sira ne’e bele hetan rezultadu iha tempu badak, maibé sei la rezolve informalidade iha sosiedade. Maibé Governu kontinua adopta aprosimasaun ida ne'e maske la efetivu, no ida ne’e hatudu katak lider sira la sériu atu harii ekonomia no sosiedade ida ne'ebé modernizadu.

Atu konklui, Fundasaun Mahein fiar katak violénsia no tátika brutál sira la bele solusiona informalidade no problema sira seluk ne’ebé rezulta husi prátika informál sira. Bainhira estadu duni sai vendedor ambulante, foti sasán no sobu uma, maibé  la rezolve kondisaun estruturál sira ne'ebé hamosu informalidade, estadu hamosu de'it kanek, hirus no konflitu sosiál. Tanba ne'e FM husu ba Governu atu halo refleisaun kona-ba poltíka jestaun urbana ne’ebé depende de’it ba forsa fízika. Implementasaun "estadu de direitu" ne’ebé brutál liu hamosu violasaun direitus umanus barak, no provoka divizaun no konflitu iha sosiedade. Estadu la bele depende de’it ba violénsia atu hatauk ema kiak sira – lider sira tenke avalia sira nia responsabilidade rasik ba situasaun ne'ebé nasaun hasoru ohin loron. Timor-Leste só bele sai nasaun ida ne'ebé modernu no organizadu bainhira estadu halakon abut informalidade no ki’ak. Karik estadu kontinua komete violénsia kontra sidadaun sira, sei hamosu malkontente no odiu, no karik Governu la kria kondisaun ba futuru ida ne'ebé prosperu, Timor-Leste sei enfrenta dezastre bo’ot iha futuru.