Uluk liu, hakarak atu fó hatene katak, artigu ida ne’e fó sai ho hanoin ida atu halo balansu ba diskusan no polémika ne’ebé mosu iha públiku kona-ba polítika rekonsiliasaun liu-liu bainhira Xefe Estadu DR. Ramos Horta hasoru malu ho lider Integrasi Eurico Gurres, iha Kupaung-Indeonezia. Nune’e mós artigu ida ne’e fó sai la’os atu hatun ka minimiza individu ka grupu balu no atu minimiza esforsu ne’ebé lideransa sira halo hodi dudu polítika rekonsiliasaun entre Timor oan sira iha Indonezia no iha Timor.
Relasiona ho titlu husi artigu ne’e ‘Rekonsiliasaun: Entre Interese Polítiku, Perdaun no Aplikasaun Lei’ iha ne’ebé titlu ne’e provoka atu ita hotu buka hatene serake Rekonsiliasaun ne’e apenas interese polítiku?, Perdaun? ka aplikasaun lei no ejize akuntabilidade ba krime ne’ebé akontese iha Timor-Leste?
Nune’e hakerek nain koko atu aprezenta hanoin balu kona-ba konseitu ‘Rekonsiliasaun’ iha ne’ebé rekonsiliasaun ne’e hanesan prosesu-mekanismu ida importante atu ultrapasa konflitu ka divizaun, tantu iha kontestu sosiál, polítiku ka jurídiku. Iha kontestu pós-konflitu, hanesan hafoin violénsia polítika ka violasaun direitus umanus. Iha prosesu rekonsiliasaun, iha aspetu importante tolu ne’ebé dala barak sai hanesan foku prinsipál, mak hanesan interese polítiku, perdaun no implementasaun lei.
Aspetu tolu ne’e dala barak konsidera hanesan kontraditóriu, maibé iha kazu barak, sira bele serbisu sorin-sorin ho objetivu atu hetan dame no justisa sosiál. Perdua iha Prosesu Rekonsiliasaun Perdaun ka amnistia maka fó perdaun ba ema ka grupu sira ne'ebé envolve iha violasaun legál ka krime balu. Iha kontestu rekonsiliasaun pós-konflitu, dalabarak perdaun sai instrumentu ida atu enkoraja parte sira ne ebé envolve iha konflitu atu admite sira-nia sala, partisipa iha prosesu dame, no harii fali relasaun sira ne ebé estraga ona. Ezemplu ne’ebé sita beibeik liu mak polítika perdaun iha ne’ebé estadu fó perdaun ba indivídu sira ne’ebé prontu atu admite sira-nia sala iha komisaun lia-loos no rekonsiliasaun. Hanesan Xefe Estadu fó perdaun ba autór kriminozu sira (milisia sira). Benefísiu sira husi perdaun iha prosesu rekonsiliasaun inklui:
- Fó espasu ba kura no renovasaun ba komunidade sira ne’ebé hetan kanek tanba konflitu.
- Prevene mosu fali violénsia foun liuhosi loke oportunidade ba diálogu no kura.
- Hamenus todan estadu nian hodi prosesa kriminozu hotu-hotu ne’ebé envolve iha konflitu boot sira.
Maibé, perdaun mós iha nia krítiku sira, liu-liu kona-ba justisa ba vítima sira. Perdaun ne’ebé fó ba autór sein konsidera impaktu ba vítima bele hamosu sentimentu injustisa no loke posibilidade ba impunidade no iha realidade hatudu duni impunidade nafatin prevalese-laiha prosesu akuntabilidade.
Aplikasaun Lei iha Prosesu Rekonsiliasaun Aplikasaun lei foka ba investigasaun, akuzasaun, no julgamentu ba kriminozu sira, ho objetivu atu fornese justisa ba vítima sira no mantein estadu direitu. Iha kontextu rekonsiliasaun nian, aplikasaun lei hanesan instrumentu importante ida hodi garante katak krime sira ne’ebé akontese la lakon kastigu no katak iha responsabilizasaun ba asaun sira ne’ebé prejudika parte seluk. Aplikasaun lei iha papél hodi prevene mosu kultura impunidade, ne'ebé bele estraga konfiansa públiku nian iha sistema legál no estadu. Aleinde ne’e, aplikasaun lei bele fó sentidu justisa ba vítima sira, ne’ebé sente katak autór sira tenke hetan kastigu tuir sira-nia hahalok. Forma aplikasaun lei ida ne’ebé koñesidu liu mak hodi estabelese tribunál espesiál sira. Maibé, aplikasaun lei iha situasaun pós-konflitu dalabarak la la’o ho di’ak. Problema prinsipál sira ne'ebé mosu inklui: Peju polítiku no sosiál ne’ebé liga ho Prosedimentu legál ne'ebé naruk bele agrava tensaun sosiál no polítiku sira ne'ebé eziste; Dezafiu sira ba lia-loos no justisa: Dalaruma, tribunál sira labele restaura lia-loos tomak ka fornese justisa ba parte hotu-hotu ne'ebé envolve no Intervensaun polítika:
Dezafiu sira no Ekilíbriu entre Perdaun no Aplikasaun Lei
Kombinasaun perdaun ho aplikasaun lei maka sai dezafiu boot ida, tanba dalaruma kestaun rua ne’e iha objetivu ne'ebé iha konflitu interese. Perdaun foka ba restaurasaun relasaun no kura, enkuantu aplikasaun lei foka liu ba kastigu no justisa ba vítima sira. Atu hetan ekilíbriu entre buat rua ne'e, presiza aprosimasaun ida ne'ebé hanoin didi'ak no kontestuál. Solusaun ida ne’ebé propoin beibeik mak modelu justisa tranzitória, ne’ebé ho objetivu atu fornese justisa ba vítima sira, enkuantu promove nafatin pás no rekonsiliasaun.
Nune’e Rekonsiliasaun, perdaun no aplikasaun lei la presiza haree hanesan buat rua ne'ebé kontraditóriu. Pelu kontráriu, buat rua ne'e bele la'o hamutuk, bainhira prosesu ne'e hala'o ho justu, transparente, no konsidera direitu sira hosi parte hotu-hotu ne'ebé envolve. Perdaun bele sai dalan ida ba kura no dame, enkuantu aplikasaun lei tenke asegura katak justisa tenke aplika, liuliu ba vítima sira.
Ekilíbriu entre auntu rua ne'e maka sai xave atu kria rekonsiliasaun loloos iha sosiedade ida ne'ebé uluk fahe malu. Rekonsiliasaun, liuliu iha kontestu polítiku, dala barak ema haree hanesan pasu ida atu hakotu konflitu ka diferensa maka'as sira, no la'ós buat foun ida atu haree hanesan pasu pragmátiku ida atu hetan estabilidade polítika ka interese balu. Maibé, se ita ezamina klean liután, rekonsiliasaun la’ós de’it interese polítiku ida, maibé bele mós sai prosesu ida kle’an liután, relasiona ho restaurasaun relasaun sosiál, rekuperasaun trauma koletivu, no kriasaun dame ba tempu naruk.
Enkuantu perdaun ba kriminozu sira maka asaun legál ida ne'ebé fó oportunidade ba ema ne'ebé komete krime ida atu hetan sentensa ne'ebé redús ka liberta hosi kastigu kompletamente. Dala barak asaun ida-ne’e envolve governu ka órgaun lejislativu nia diskrisaun iha situasaun partikulár ida, no bele hola forma fó indultu jerál ka espesiál.
Iha razaun oioin tansá maka fó perdaun, ida-ne'e inklui Konsiderasaun Umanitária: Perdaun bele fó bazeia ba razaun umanitária, hanesan karik autór krime nian hatudu remorsu klean, iha komportamentu di’ak bainhira kumpre ninia sentensa, ka karik sira fó kontribuisaun pozitivu ba sosiedade; Reabilitasaun no Integrasaun Sosiál: Objetivu husi perdaun bele enkoraja prosesu reabilitasaun kriminozu sira atu nune’e sira bele reintegra iha sosiedade hafoin kumpri sentensa ruma. Situasaun Emerjénsia ka Polítika Governu nian: Governu bele fó perdaun hanesan parte ida hosi polítika balu, porezemplu amnistia ba grupu balu ka atu bele hamenus tensaun sosiál no polítika; Perdaun iha Sistema Jurídiku: Iha sistema legál balu, perdaun bele halo parte iha prosesu dame ka rekonsiliasaun. Porezemplu, iha kazu sira ne'ebé envolve violasaun direitus umanus hanesan iha Timor-Leste, bele fó perdaun nu'udar parte ida hosi akordu dame nian hodi hakotu konflitu.
Maibé, perdaun ba kriminozu sira persiza haree mós Justisa ba Vítima sira: Perdaun bele konsidera hanesan renúnsia ba vítima nia direitu. Vítima ka vítima nia família bele sente katak autór ba krime ne e la hetan kastigu ne ebé adekuadu ba nia hahalok; Potensiál ba Abuzu: perdaun sira bele uza sala atu proteje indivídu sira ho podér ka influénsia, nune'e kria injustisa iha aplikasaun lei nian. Efeitu ba Prevensaun Krime: Perdaun bele hanoin atu hamenus efeitu disuasaun ba kriminozu potensiál sira. Ikus liu, perdaun sira tenke konsidera ho kuidadu, hodi garante katak sira konsistente ho prinsípiu sira justisa nian, umanidade nian no interese públiku nian.
Prosesu ba Krime Grave
Hanesan Timor-oan hotu hatene no akomapaña Estadu Timor-Leste halo ona esforsu lubuk hodi buka solusaun ba violasaun sira komete husi Milisia Pro-Indonezia ho apoiu husi Militár no Polisia Indonezia ne’ebé akontese hahú husi períodu 1975-1999. Esforsu sira ne’e, governu Timor-Leste hatudu liuhusi, iha tinan 2001 harii Komisaun Simu, Lia-loos, no Rekonsiliasaun (CAVR), ne’ebé ho objetivu atu fó sai lia-loos kona-ba violasaun direitus umanus ne’ebé akontese durante kolonizasaun Indonézia iha Timor-Leste. Komisaun ida ne’e, hamutuk ho orgaun legál sira seluk, fó rekomendasaun ba julgamentu ba indivídu sira ne’ebé involve iha krime grave.
Aleinde esforsu rai-laran, iha tinan 2000, Konsellu Seguransa ONU estabelese Painél Espesiál ba Krime Grave (SPSC) iha Timor-Leste hodi halo julgamentu ba autór krime grave sira ne’ebé akontese iha tinan 1999. Maibé, prosesu legál liuhosi mekanimu internasionál ida-ne’e tribunál limitadu, no indivídu balun de'it maka hetan kastigu, enkuantu autór barak la hetan responsabilidade tomak. Balun kritika katak tribunál sira-ne'e la kobre ho adekuadu autór prinsipál sira hotu, no husi prosesu ne’e iha númeru boot ida hosi indivídu liu-liu eis jenerais sira ne'ebé envolve iha krime grave sira sei livre nafatin no laiha prosesu akuntabilidade.
Nune’e mós, tribunál internasionál ba krime grave sira, iha Indonezia mós halo prosesu ba krime grave ne’ebé akontese iha tinan 99 liuhusi Tribunál Adhock Jakarta-Indonsia, maibé rezultadu sira husi prosesu ne’e la responde ba povu Timor-Leste liuliu vítima sira nia ejizensia no públiku/vítima sira konsidera prosesu ida ne’e hanesan ‘polítika taka falta’ ka hanesan ‘polítika kurtina’ ida husi Estadu Indonezia hodi hatudu ba mundu Internasional katak Estadu Indonezia sériu buka solusaun ba aktu sira ne’ebé komete husi Eis Jenerais sira no milisia sira iha Timor-Leste. Maske nune’e Komunidade internasionál kontinua enkoraja Estadu Indonézia atu hala’o prosesu barak liután ba autór militár (Eis Jenerais sira) no milísia sira ne’ebé envolve iha aktu violasaun direitu umanus ne’ebé akontese iha Timor-Leste.
Ita hotu haree no akompaña katak dezafiu sira atu hetan justisa no akuntabilidade ba krime grave, iha ne’ebé interese Polítika no Relasaun Internasionál sai hanesan dezafiu atu bele realiza prosesu justisa no ejize akuntabilidade ba violasaun direitu umanu durante okupasaun illegal military Indonezia iha Timor-Leste. Ema barak sente no hatene katak relasaun polítika entre Timor-Leste no Indonézia sai hanesan obstákulu boot hodi garante justisa ba vítima krime grave sira. Dala barak Indonézia no Timor-Leste envolve iha esforsu diplomátiku sira ne’ebé fó énfaze ba rekonsiliasaun envezde prosesa liután autór krime grave sira. Iha realidade hatudu katak lideransa husi Nasaun rua ne’e hakarak liu oinsa atu bele halo rekonsiliasaun ho Indonezia, liuliu rekonsiliasaun ho Timor-oan sira ne’ebé politikamente sira lakon ona ne’ebé hatudu liuhusi konsulta popular iha tinan 1999 ne’ebé pursentu 21 husi populasaun Timor-Leste hili Otonomista no pursentu 78,5 hili atu separa husi Indonezia (Ukun Rasik-an).
Ema hotu hantene katak Liderasan Timor-Leste hanoin no konsidera katak relasaun diak ho Indonezia mak solusaun ida ne’ebé diak liu no koko haluha problema sira ne’ebé akontese iha pasadu, ida ne’e hatudu liuhusi polítika rekonsiliasaun ne’ebé lideransa rai rua (Timor-Indonezia) hatudu liuhusi vizita no konvida eis jenerais sira ne’ebé envolve no iha responsabilidade ba aktu sira ne’ebé akotese durante okupasaun illegal iha Timor-Leste. Lideransa sira hanoin katak liuhusi polítika rekonsiliasaun hanesan mekanismu uniku dalan diak atu bele asegura paz no estababilidade iha Timor-Leste no hakotu siklu korente odiu-vingansa entre Timor-oan sira. Tanbá ne’e lideransa sira kontinua halo esforsu hodi dudu polítika rekonsiliasaun entre Timor-an sira iha Indonezia no iha Timor.
Esforsu hodi dudu polítika rekonsiliasaun iha realidade ladun hetan apoiu husi povu Timor-Leste, liu-liu família no vítima sira, realidade ida ne’e hatudu bainhira Xefe Estadu DR. Ramos Horta iha 13 Novembru 2024 hasoru malu ho Eurico Guterres hanesan lider boot Pro-Integrasi. Depois de hassoru malu ida ne’e mosu reazen pro no kotra. Povu Timor liu-liu familia vítima sira sente triste tebes no sira konsidera hasoru malu ida ne’e la tama iha logika kuandu lideransa ida sekaliber DR. Ramos Horta, lideransa ida ne’ebé mundu rekuñese, lideransa ne’ebé kuñesediu iha mundu, Laureadu Nobel da Paz, Prezidente da RDTL mak ba buka fali seorang Eurico Guterres ho titlu hanesan pahlawan pembela merah putih. Publiku konsidera vizita no hasoru malu ida ne’e hatun tebes povu no nasaun nia kredibilidade, integridade nune’e mós dignidade hanesan Prezidente da RDTL.
Esforsu ne’ebé Xefe Estadu halo hodi dudu polítika rekonsiliasaun, maibé nafatin sei iha dúvidas no preokupasaun kona-ba polítika rekonsiliasaun, dúvidas no hamosu pergunta ba públiku katak seraké polítika rekonsiliasaun ne’e bele resolve problemas no rensponde ba públiku liu-liu vitima sira nia ejizensia atu bele hetan justisa no bele rekupera trauma ne’ebé sira iha. Hatan ba perguntas ne’e hakerek nain hakarak fó observasaun balu liga ho polítika rekonsiliasaun ne’ebé konsidera hanesan mekanismu ida ne’ebé bele fó solusaun balu deit ba problema ka violasaun ne’ebé akontese iha Timor-Leste, maibé la’os mekanismu ida úniku atu fó solusaun ida ne’ebé lais no fó satisfasaun ba parte hotu liu-liu familia vítima sira. Hanoin katak importante tebes atu uza aproximasaun ne’ebé luan no kontinuidade ne’ebé persiza konsidera pontu importanre sira hanesan Integra rekonsiliasaun ho justisa sosiál no jurídika, Hasa’e edukasaun no diálogu entre grupu sira hodi hamenus prekonseitu no ódiu, Fó apoiu psikososiál ba vítima violénsia no sira-nia família, Hametin demokrasia no justisa ekonómika hodi prevene injustisa foun mosu iha futuru.
Timor-oan hotu-liu-liu vítima no familia v’itima sira hanoin katak importante ba Timor-Leste atu kontinua dudu ba realizasaun justisa no akuntabilidade. Etapa ida ne’ebé bele kontinua hametin sistema justisa doméstika hodi haree ba violasaun direitus umanus ne’ebé akontese iha pasadu. Aleinde ida-ne’e, atu hetan justisa jerál, kooperasaun internasionál ne’ebé sólidu liu, inklui ho Indonézia, importante tebes atu nune’e autór prinsipál sira ne’ebé seidauk hetan julgamentu bele prosesa tuir lei. Prosesu ida-ne’e la’ós de’it relasiona ho lei, maibé mós ho nesesidade kle’an kona-ba rekonsiliasaun sosiál entre grupu oioin iha Timor-Leste no Indonézia.
Atu hetan justisa ba vítima krime grave sira iha Timor-Leste presiza korajen, kompromisu no kooperasaun maka’as iha nivel doméstiku no internasionál. Polítika rekonsiliasaun ho autór kriminozu sira lahó justisa dala barak iha impaktu sériu, tantu iha tempu badak no tempu naruk. Tipu rekonsiliasaun ida-ne'e normalmente akontese iha kontestu nasaun ida ne'ebé maka halo tranzisaun hosi konflitu ka rejime autoritáriu ba governu ida ne'ebé maka demokrátiku ka estável liu.
Maibé, bainhira prosesu rekonsiliasaun ne’e hala’o sein akompaña ho esforsu justisa no akuntabilidae, impaktu ne’e bele estraga prosesu páz no dezenvolvimentu nasaun nian. Impaktu sira ne’e hanesan 1) Ignoransia ba vítima sira nia direitu, iha ne’e oinsa atu bele kuidadu vítima sira husi krime (hanesan omisídiu, tortura, violasaun eksuál no lakon forsadu) halo sira trauma no kanek ne’ebé sira hetan no ate agora seidauk kura, ida ne’e importante no presiza justisa no akuntailidade atu rezolve sira-nia trauma no bele responde ba sira nia ejizensia. Laiha justisa, vitima ka vitima sira nia familia bele sente abandonadu, ne’ebe bele halo aat liu tan kanek sosial no psikolojiku ne’ebe sira hetan-esperiensia. 2) Violasaun Direitus Umanus ne’ebé seidauk resolve, enkuantu Rekonsiliasaun lahó justisa, ida ne’e bele hamosu violasaun direitus umanus bainhira autór sira ne’ebé responsabel aktu krime grave la hetan kastigu ka seidauk rezolve, nune’e nega direitu ba vítima sira atu haree autór sira responsabiliza ba sira-nia asaun. 3) Hafraku Justisa Sosiál no Instituisaun Estadu sira, Lakon Konfiansa iha Instituisaun Estadu: Bainhira estadu hili atu rezolve ho kriminozu sira lahó prosesu legál ne’ebé klaru, ida-ne’e bele halakon konfiansa públiku nian iha instituisaun justisa sira, hanesan tribunál, polísia no instituisaun estadu sira seluk. Povu bele sente katak lei ne’e aplika de’it ba ema balun, enkuantu kriminozu sira ne’ebé iha podér polítiku ka militár bele halai sees husi akuntabilidade. 4) Normalizasaun ba Krime: Hodi halo rekonsiliasaun lahó justisa, estadu indiretamente bele justifika komete krime, ka pelumenus sujere katak krime ne’e sei la hetan kastigu. Ida-ne’e bele kria kultura impunidade, iha-ne’ebé kriminozu sira sente katak sira bele halo violénsia ka ofensa sira lahó konsekuénsia. 5) Hasa’e tensaun sosiál no konflitu; ne’ebé foku ba konseitu importante rua hanesan:
Polaridade Sosiál: Bainhira rekonsiliasaun hala’o la haree ba justisa, ida-ne’e bele agrava tensaun entre grupu sira ne’ebé afetadu hosi krime no grupu sira ne’ebé hetan benefísiu hosi status quo. Porezemplu, grupu sira ne'ebé sofre hosi krime bele sente katak sira hetan tratamentu ne'ebé la justu, ne'ebé bele hamosu tensaun sosiál sira. Nune’e mós Potensial Retornu husi Violensia: Rekonsiliasaun la ho justisa bele kria insatisfasaun entre sira ne’ebe sente desvantajen, no ida ne’e bele loke odamatan ba fila fali ba violensia ka tensaun sosial. Se kriminozu sira sente katak sira laiha buat ida atu tauk, sira bele iha vontade liu atu kontinua komete krime sira iha futuru.
6) Afeta Lejitimidade Governu nian, impaktu ne’e liga ho Lakon Lejitimidade Internasionál iha ne’ebé bainhira Rekonsiliasaun lahó justisa dala-barak hetan krítika hosi komunidade internasionál, liu-liu hosi organizasaun direitus umanus ka nasaun sira ne’ebé apoia justisa tranzisionál. Ida-ne'e bele estraga imajen nasaun nian iha mundu nia matan no hamenus apoiu internasionál. Nune’e mós impaktu seluk mak Lakon iha Dezenvolvimentu Nasaun iha ne’ebé iha tempu naruk, nasaun ne’ebé falla atu kaer metin justisa bele hasoru dezafiu boot iha dezenvolvimentu no dezenvolvimentu sosio-ekonómiku. La ho rezolusaun ida ne’ebé justu ba violasaun sira iha pasadu, relasaun entre grupu sira iha sosiedade bele hetan perturbasaun, no potensiál ba dezenvolvimentu inkluzivu no sustentável sei hetan difikuldade. 7) Impaktu seluk mak sei Hamenus komprensaun no konxiénsia istóriku, iha impaktu ida ne’e liga ho kestaun bainhra Nega Istória iha ne’ebé Rekonsiliasaun lahó justisa bele estraga ema nia komprensaun kona-ba sira-nia istória rasik. La ho tribunál sira ka prosesu legál sira ne'ebé transparente, iha potensiál atu taka ka taka realidade kona-ba saida maka akontese iha pasadu. Ida-ne'e bele sai prejudisiál ba jerasaun sira iha futuru ne'ebé laiha komprensaun klaru kona-ba sala sira ne'ebé maka halo ona no oinsá sira tenke aprende hosi sira. 8) Alende ne’e impaktu seluk mak kona-ba ‘Responsabilidade ne'ebé ki'ik’, ne’e liga ho Impunidade kontinua Prevalese, iha ne’ebé bainhira autór kriminozu sira la responsabiliza aktu sira ne’ebé komete hasoru sidadaun sira iha Tmor-Leste, ida-ne'e bele difikulta reforma iha sistema seguransa no polítiku sira, no mós halo fasil liu ba indivídu sira ho podér atu kontinua komete abuzu sira ne'ebé hanesan iha futuru.
Finál
Iha konkluzaun ne’e atu subliña pontu importante sira iha ne’ebé hakerek nain hanoin katak lideransa sira nia esforsu hodi dudu Polítika Rekonsiliasaun ne’e hanesan mekanismu ida importante, maibé rekonsiliasaun ne’e tenke akompaña ho prosesu justisa, akuntabilidade, rekuperasaun ekonómika no governasaun ne’ebé justu.
Hakerek nain mós hanoin katak esforsu hodi dudu Polítika rekonsiliasaun ne’e sei la falun ho rekonsiliasaun ida ho liafuan ‘obriga’/forsa-memaksa tanbá ne’e bele fó impresaun katak rekonsiliasaun bele la'ós sempre la'o ho maneira ida ne'ebé ideál. Ida-ne'e bele hatudu katak prosesu rekonsiliasaun dalabarak hetan forsa/obriga, tantu hosi forsa polítika sira ka hosi parte interesadu sira seluk, hodi nune'e sakrifika justisa loloos.
Rekonsiliasaun forsadu ne’e bele signifika katak parte sira ne’ebé envolve la hetan duni justisa ba buat ne’ebé sira esperiénsia ka halo. Dalan ba justisa loloos dala barak kompleksu liu, tanba ida-ne'e la'ós de'it envolve rekoñesimentu no rezolusaun ba konflitu, maibé mós justisa transparente, responsabilizasaun ba sira ne'ebé responsavel, no reparasaun ba vítima sira.
Iha kazu barak, prosesu rekonsiliasaun forsadu bele ignora elementu sira-neebé mensiona iha leten, por-ezemplu hodi minimiza responsabilidade legál ba autór ka ignora vítima nia nesesidade ba reparasaun. Entaun, hamosu pergunta, seraké polítika rekonsiliasaun ne’ebé lideransa sira dudu/luta ba ne’e hanesan rekonsiliasaun forsadu/memaksa?, konvida ita hotu halo reflesaun liután: seraké bele duni rekonsiliasaun forsadu lori ba justisa loloos, ka taka kanek tuan sira ne'ebé seidauk kura tomak?
Dili, 28 Novembru 2024
Defendi a terra de Timor-Tera Santa até à última gota de sangue,
tal como fizeram os meus heróis
O Senhor Jesus Protege a Pátria e o Povo de Timor-Leste
