Durante vizita, Abel dehan governu apresia tebes ho laran di’ak hosi autoridade lokál, povu no veteranu Rejiaun III ne’ebé iha inisiativa makas harii eskola ne’e ba Timor oan sira hotu.

Nia dehan, autoridade Manufahi hatama ona proposta ba Ministériu Edukasaun atu haree apoiu fundus ba harii eskola universidade Don Boaventura.

“Sira nia fatin ha’u ba haree ona,sira iha rai,iha sala administrasaun, sala aula  tolu (3) maibé iha momentu ne’e ha’u ba surufei ba fatin ne’e iha semana rua liubá,” dehan Abel ba jornalista iha salaun Ministériu Solidariedade Sosiál (MSS), horisehik.

Nia dehan, Prezidente Parlamentu Nasionál, Adérito Hugo da Costa no Veteranus, Reak Leman no povu sira lansa ona fatuk ba konstrusaun eskola ne’e.

Tanba governu, sei haree hela proposta ne’e hodi deside orsamentu hira maka sei fó apoiu.

“Sira nia proposta tama ona no entrega ona mai iha Ministru Edukasaun,” dehan Vice Abel.

Nia dehan, governu mós sei apoiu tuir kbiit ne’ebé governu iha hanesan apoiu ba universidade sira seluk iha TL.