Momentu ida ne’ebé furak, Kay Rala Xanana Gusmão uluk nuudar Komandante Gerrilia no Wiranto, uluk nuudar Jeneral Militar Indonesia nian iha tempu invasaun, sira inimigu iha pasadu, maibé ba intrese nasaun ida-idak nian tenki lori sira hasoru malu fali ho ambiente amigavél.
Realidade, segunda horbainruak (22/7), iha Jakarta, reprezentante Espesiál Timor-Leste ba Delimitasaun Fronteira Terrestre, Kay Rala Xanana Gusmão no Governu Indonezia liu husi Ministru Kordenadór ba Polítiku Direitu no Seguransa, Wiranto, asina ona akordu komplementar Fronteira Rai (terrestre), ne'ebe durante ne'e la konsege rezolve liuliu Segementu rua iha Oekusi.
Akordu komplementar ne’ebé asina mak iha Rejiaun Administrativa Oekusi-Ambeno (RAEOA) hanesan segimentu iha Citrana-Noel Besi (Distritu Kupaun) no Oben-Bijal Sunan. Ho asinatura ne’e, Timor-Leste ho Indonézia hakotu ona fronteira rai-maran no tuir mai sei avansa ba fronteira tasi (máritima).
Asinatura akordu komplementar ne’e hetan mós asiste no sai testamuña husi parte Timor-Leste nian mak hanesan Embaixadór Timor-Leste ba Indonésia, Carlos Alberto, Xefe Ekipa Tékniku ba Fronteira Terrestre, Embaixador Roberto Sousa, enkuantu husi Indonézia Ministru Estranjeiru, Retno Marsudi.
“Ha’u hatoo katak disputa hotu-hotu kona-ba fronteira terrestre emprinispiu hotu ona. Tuir fali mai ita sei halo deskusaun kona-ba fronteira maritíma,”dehan Wiranto, hafoin asina akordu entre Timor-Leste ho Indonesia, iha edifisiu Ministériu Koordenadór ba Assuntu Politika Justisa no Defeza, iha Jakarta.
Molok asina akordu, iha 30 minutu nia laran ekipa RI no TL hasoru malu, Wiranto informa katak enkontru ne’e fó hanoin fali, mesmu iha pasadu rai rua ne’e iha konflitu, maibé iha tiha ona komprimisiu hodi haluha tiha pasadu no hateke ba oin ne’ebé nakonu ho amigavél, domin no páz entre nasaun rua ne’e ho povu.
“Iha pasadu ita iha konflitu, no ita promete atu fundamentu relasaun maun-alin no pás ne’ebé eterna (abadi). Bazeia ba fundamentu ne’e, ohin ita rejolve ona kestaun fronteira terrestre,”dehan Wiranto iha lian Bahasa.
Entretantu, Xanana agradese ba Wiranto ne’ebé konsege hetan akordu id aba intrese rai rua ne’e nian kona-ba fronteira terrestre (rai maran).
"Ita hela atu fianliza, kontinuasaun. Tanba ne’e ha’u dehan lalais liu di’ak liutan. Ita sei kontinua halo negoaisaun kona-ba fronteira maritíma,”dehan reprejentante espesial Timor-Leste ba fronteira terretre. (Fonte Notisia ANTARA)
