Governu Austrália rasik prontu ona asina nota kona-ba Tratadu Fronteira Marítima nasaun rua nian, ne’ebé tuir planu sei asina loron konsulta populár hanesan loron istória auto determinasaun Timor-Leste ba ukun-aan.

Embaixadór Austrália mai Timor-Leste, Peter Robert hateten, prosesu tomak relasaun asina nota Austrália ho Timor-Leste kona-ba Tratadu Fronteira Marítima ne’ebé mak tuir planu atu asina prontu hotu.

Parlamentu Austrália ratifika ona Tratadu Fronteira Marítima, maibé nia rekoñese prosesu iha Timor-Leste seidauk hotu no Austrália respeitu nafatin prosesu ne’e.

“(Prosesu iha) Austrália hotu ona, bainhira Timor-Leste deside ona kona-ba loron ne’ebé tuir planu, Austrália prontu atu ratifika”, dehan nia, iha Kaza Sidadania, Taibesse, Sesta (9/8).

Embaixadór Peter mós iha esperansa atu sidadaun Australianu barak sei mai partisipa iha selebrasaun tinan 20 Konsulta Populár Timor-Leste nian ne’ebé sai istória ba Timor-Leste ho Austrália.

Nune’e, Austrália prontu atu koopera ho Timor-Leste hodi foka liu ba futuru entre nasaun rua nian.

Nia fiar katak, Loron Konsulta Populár hanesan loron ne’ebé importante ba povu Timor-Leste hodi halo reflesaun kona-ba pasadu hodi hakat liu ba futuru.