IHA 2006, bainhira nia ain hakat sai husi portaun Palasiu Governu, nia ibun hasai juramentu ida. Juramentu ne’ebé mai husi kanek iha fuan. Kanek tan hakat ne’e seidauk to’o rohan, balun obriga atu tenke para.

Iha 26 Juñu 2006, Primeiru Ministru Mari Alkatiri hasai deklarasaun ida hodi rezigna an husi ninia kargu nudar Xefe Governu. Desizaun ne’ebé nia tenke foti tan presaun boot iha krize politika militar nia laran.

Hafoin tinan 11 liu, Alkatiri hetan hikas fiar atu kontinua ninia servisu ne’ebé seidauk ‘hotu’. Bloku Koligasaun, FRETILIN no PD, deside hodi nomeia Sekretariu Jeral FRETILIN ne’e ba kargu Primeiru Ministru VII Governu Konstitusional.