Maski nune’e, desizaun ne’e hetan reasaun makaas husi Sosiedade Hadomi Bola iha Timor-Leste ne’ebé hanaran AMANTE, relasiona ho informasaun katak FFTL halo ona kongresu estraordináriu.
Reprezentante AMANTE, José Luis Oliveira, kestiona makaas lejitimidade husi kongresu ne'e tanba la tuir lei.
Ne’e duni, tuir versaun AMANTE, kongresu estraordináriu ne’e ema barak la hatene. Estrutura iha FFTL laran bolu malu de’it depois konkorda malu troka estrutura tuir sira nia hakarak, la liu husi prosesu abertu.
“Ne’e buat ida ke ita kontra. Se ida ne’e kompañia privadu sira nian, sira nian ba… Mas ida ne’e patrimóniu públiku nian. Públiku nia sasán, tanba tau naran ne’e Timor-Leste. Ne’e duni tenke tuir regra,” dehan nia, iha Faról-Dili, horisehik.
José esplika, tuir regra normál asosiasaun sira, liuliu klube futeból, asosiasaun arbitrajen sira tenke partisipa. Maibé, iha kongresu estraordináriu foin lalais la envolve komponente sira ne’e.
“Mai ha’u laiha lejitimidade,” tenik nia.
Responde ba kestaun ne’e, Nélio Isaac Sarmento hatete, depois sekretariu jerál atuál FFTL hetan sansaun no sresidente sei hala’o tratamentu saúde, estrutura ezekutivu sira deside hala’o re-estruturasaun ba provisoriu hodi indika nia nuudar sekretariu jerál ezérsisiu no Osorio ba Presidente ezérsisiu.
“Ne’e katak ami na’in rua (Nelío ho Osorio) nia tugas atu organiza FFTL kontinua lao nafatin too iha kongresu tuir mai, alias nuudar pejabat pelaksana FFTL de’it,”tenik Nélio hodi klarifika notisia diario INDEPENDENTE.
Nélio hatutan, desizaun internal FFTL ne’e mós informa ona ba organizasaun FIFA hanesan AFC ho AFF.
“Agora ami servisu hela, halo normalizasaun ba iha FFTL no oinsá atu halo preparasaun ba kongresu bazeia ba estatutu FFTL nian rasik,” dehan nia.
Ne’e duni, la taka dalan iha tempu oin mai sei realiza kongresu normál hanesan baibain. Tanba ne’e, eis xefe redasaun RTTL ne’e klarifika katak FFTL seidauk halo kongresu extra-ordinariu no Kalbuadi Lay sei assume kargu presidente FFTL.
“Ami estrutura ezersisiu de’it, pelaksana harian de’it,”dehan nia.
