Tomada-de-pose ne’ebé hala’o iha PN marka prezensa husi Primeiru Ministru VII Governu Konstitusionál, Mari Alkatiri, hamutuk ho membru governu sira.

Maski nune’e, Prezidente no portavós AMP ne’ebé mós eleitu nu’udar membru PN ba períodu 2018 – 2022 la marka prezensa.

Prezidente Bankada Partidu Libertasaun Populár (PLP), Fidelis Leite Mangalhães hateten, portavós AMP, Taur Matan Ruak, dezde tomada-de-pose IV lejizlatura mós la marka prezensa.

Nune’e, pose V Lejizlatura ne’e mós la marka prezensa, maki nune’e kontinua akompaña prosesu ne’e tomak.

“Substitui membru deputadu ho númeru 35 mak Sabino Soares ‘Guntur’ husi bankada PLP”, dehan nia, iha Uma Fukun PN, horisehik.

Iha fatin hanesan, Prezidente Comisaun Diretiva Nasionál (CDN), Dionísio Babo Soares hateten, Xanana Gusmão la marka prezensa tanba antes ne’e halo ona substituisaun ba Deputadu foun bankada CNRT hodi partisipa pose V Lejizlatura.

Nia dehan, maski Prezidente AMP la marka prezensa iha uma fukun Parlamentu Nasionál, maibé prosesu desizaun tomak entrega ona ba membru Deputadu V Lejizlatura hodi akompaña prosesu no foti desizaun.

Entretantu, Prezidente PN, Aniceto Longuinhos Guterres hateten, karta substituisaun husi Prezidente partidu CNRT, Kay Rala Xanana Gusmão ho Prezidente partidu PLP haruka ona mai meza PN.

Nia esplika, maski sira na’in rua halo ona karta substituisaun hodi hetan ona aseitasaun husi partidu rasik, ne’ebé renunsia ona dokumentu sira ne’e sei submete ba komisaun verifikasaun atu haree validade no mós legalidade kona-ba renunsia ne’e.