Deputadu Joaquim dos Santos hatete, desizaun dahuluk ne’ebé Konsellu Administrasaun Parlamentár III Lejizlatura halo ne’e, atu leilaun karreta Prado. Tanba ne’e, administrativamente eis-deputadu sira tuir hotu ona, nune’e karreta nia xapa matríkula tau hotu ona privadu.

Maski nune’e, bainhira prosesu ne’e la’o Prezidente PN muda desizaun hodi anula alienasaun karreta tanba hetan presaun husi públiku.

“Karreta hirak ne’e sai ona privadu ikus mai anula fali, entaun desizaun ne’e nulu. Eis-deputadu sira lori ona karreta ne’e balun keta fa'an tan mós ita la hatene laiha informasaun ona”, dehan nia iha PN, horisehik.

Hataan ba kestaun ne’e, Presidente PN, Arão Noe de Jesus hatete, antes ne’e Prezidente PN, Adérito Hugo da Costa, finalmente suspende ona prosesu alienasaun. Tuir loloos iha IV Lejizlatura rekolla hotu ona, maibé tanba sira ladún sériu ba asuntu ne’e, entaun rai fali mai iha V Lejizlatura atu rezolve.

“Osan ba leilaun nian fó fila hotu ona, ha’u rasik mós simu ona ha’u nian nune’e xapa matríkula tau fali ona Parlamentu nian” tenik nia.

Nia esplika, bainhira anula desizaun ba leilaun karreta ne’e, PN devolve hotu ona eis-deputadu sira nia osan. Tanba ne’e, ohin loron maski karreta balun sira tau ona xapa matríkula privadu, maibé ne’e nafatin karreta Estadu tanba sira la sosa ho nia osan privadu.

Ho nune’e, hanesan Prezidente PN husu ona ba asesór sira rekolla daudaun ona karta hodi haree legalidade atu ba oin bele halo ona desizaun ruma hodi rekolla karreta no entrega hikas ba PN hodi halo jestaun.