Labele partisipa iha soru-mutu ne’e, eis-Prezidente Repúblika ne’e manda de’it karta ba Xefe Estadu, nu’udar ninia hanoin oinsá atu hapara impase polítika iha rai laran.

Antes ne’e, Prezidente Repúblika halo ona diálogu ho partidu lima ne'e be hetan asentu iha parlamentu nasionál hodi rona opiniaun sira nian ba situasaun polítika ne’e.

Bazeia ba artigu 90 Konstituisaun, Xefe Estadu tenke rona mós Konsellu Estadu sira nia hanoin molok halo desizaun ruma ne'ebé afavor ba interese nasionál.

Prezidente Konsellu Diretiva Nasionál (CDN) partidu CNRT, Dionísio Babo Soares hatete, Xanana Gusmão la konsege tanba okupadu ho enkontru ne'ebé relasaun ho delimitasaun fronteira marítima.

“Maun Boot Xanana manda ona karta mai iha Prezidente Repúblika. Nia esplika katak rezultadu saida de'it mak foti nia sei simu”, dehan nia, iha Uma Fukun PN, horisehik.

Maibé, rezultadu husi enkontru Konsellu Estadu ne’e relata fali ba maun boot Xanana atu nia mós bele fó hanoin oinsá mak bele solusiona problema ne’e hodi hakat hamutuk ba oin.

Enkontru Konsellu Estadu ne’e partisipasaun individuál, tanba ne’e ema ida labele reprezenta nia hodi hasoru Presidente Repúblika (PR). Tanba ne’e, Xanana rasik espresa nia hanoin liu husi karta.

Hanoin kona-ba impase polítika ne'ebé mosu iha rai laran, desizaun saida de'it mak sei mosu sei respeita no hakru'uk. Tanba konfia Xefe Estadu nu’udar lideransa ho antesedente jurista, tan ne’e sei halo desizaun tuir konstituisaun.

Oras ne’e daudaun, Xanana iha nasaun ne'ebé parte direjente CNRT rasik la hatene nia paradeiru, tanba sempre movel ba nasaun sira hodi halo servisu.

Aleinde ne’e, seidauk hatene loloos bainhira mak fila. Maibé, CNRT iha esperansa makaas atu bele fila lalais mai Timor iha tempu badak, nune’e hamutuk ho lider sira seluk hakotu impase polítika ne’e.

Xanana nia mensajen mak husu ba povu atu hatudu nafatin maturidade, hakmatek hodi akompaña situasaun polítika hodi hein desizaun Prezidente Repúblika nian ne'ebé sei tuir duni dalan Konstituisaun.