Maski nune’e, Prezidente partidu CNRT ne’e lakohi atu ema partidariza asuntu fronteira marítima. Maibé, ne’e Estadu Timor-Leste nian. Ne’e duni, tenke tau nafatin interese nasionál iha leten.

“Ha'u mak lidera negosiasaun fronteira marítima, maibé CNRT la pudia dehan fronteira marítima ne’e CNRT ninian. Labele!” tenik Xanana, iha aeroportu Dili, hafoin fila husi estranjeiru, horisehik.

Nia hatutan, interese Nasionál tenke tau iha leten. Nia mak xefe negosiadór, maibé lakohi aproveita katak ida ne’e CNRT nian rasik.

“CNRT rasik labele dehan, haree maun boot mak kaer ne’e mak manan. Laiha! Ne’e Estadu nian”, hateten Xanana.

Setembru Rona Rezultadu

Durante prosesu negosiasaun ne’e la’o, nia dehan, Timor halo Austrália kolen no stress uitoan, maibé Timor fiar katak to’o fulan Setembru sei hetan rezultadu ida di'ak kona-ba liña fronteira marítima.

“Ha’u nu’udar xefe negosiadór, ha’u fiar tetebes no ha’u fiar mós povu sei kontente ho servisu komisaun nian liu husi ekipa ne'ebé ita hari di'ak tetebes. Ne'ebé, governu, povu no Estadu haree mai ha’u. Kuandu imi haree mak ha’u kontente signifika negosiasaun ne’e mós sei iha rezultadu di'ak. Maibé kuandu imi haree ha’u mak oin triste buat ne’e dala ruma la di’ak”, tenik nia.

Prezidente partidu CNRT hateten, Timor- Leste tenke agradese ba Austrália, tanba kleur ona lakohi ko'alia ho timoroan sira kona-ba problema liña fronteira marítima, maibé ohin Austrália hakarak ko'alia fila-fali ho Timor liu husi komisaun ho vontade no laran di'ak.

Baibain Timor apresia de’it, maibé agora agradese tetebes Austrália tanba hakarak ona partisipa iha negosiasaun maiske la hamutuk. Ekipa Austrália agora ho laran moos no boa fee hakarak ko'alia fali ona kona-ba fronteira marítima ho Timor. Ne'ebé, husi negosiasaun ne’e bele hetan rezultadu di'ak iha Setembru ne’e Timor ho Austrália bele sai nafatin amigu.

“Ha’u mós labele dehan ha’u kontente tetebes ona, maibé ha’u bele dehan to’o Setembru ita bele hetan rezultadu ida ne’ebé di'ak tebetebes”, hateten Xefe Negosiadór.