Prezidente partidu KOTA, Manuel Tilman hateten, nia la simu ho desizaun TR ninian no sei halo fali rekursu estraordináriu revizaun sentensa. Tanba tuir lei ne’ebé TR kaer ne’e sira interpreta la loos.
Nia konsidera KOTA ho ASDT hanesan partidu ne’ebé kontribui ona ba Estadu sira mós uluk hetan asentu iha Parlamentu Nasionál hodi halo lei balun.
Tanba ne’e, kuandu TR rejeita tan sira nia rekursu estraordináriu revizaun sentensa mak sira sei rejistu foun fali hodi hetan hikas sira nia estatutu nu’udar partidu polítiku.
Antes ne’e, KOTA ho ASDT hatama rekursu iha loron Kinta (29/3) liu ba no iha loron Sábadu (31/03) semana kotuk TR hasai kedas desizaun hodi rejeita sira nia rekursu.
Razaun TR rejeita ne’e haree ba dekretu lei númeru 3/2004, loron 14 de Abríl, KOTA ho ASDT la partisipa ona eleisaun durante tinan lima, nune’e laiha programa rasik iha nivel nasionál ka lokál.
Rekursu partidu KOTA ho ASDT ne’e haree husi juis relator Guilhermino da Silva, Jacinta Correia ho Edite Palmira.
Antes ne’e, iha partidu polítiku sanulu (10) maka rejistu atu tuir eleisaun, maibé TR haruka fila partidu rua KOTA no ASDT tanba iha problema balun.
Ne’e duni, to’o oras ne’e partidu ualu (8) ne’ebé laiha problema maka hanesan partidu FRETELIN, Partidu Demokrátiku (PD), Partidu Esperansa Pátria (PEP), Partidu Republikanu (PR), partidu koligasaun Aliansa Mudansa ba Progresu (AMP), Movimentu Dezenvolvimentu Nasionál (MDN), Frente Dezenvolvimentu Demokrátiku (FDD) no Movimentu Sosiál Demokrata (MSD).
