Rezultadu husi sorteiu ne’ebé dada partidu boot sira ne'ebé iha poténsia borus ba parlamentu nasionál hotu-hotu hetan númeru pár. Hanesan Partidu Demokrátiku (PD), Partidu FRETILIN no Aliansa Mudansa ba Progresu (AMP).

Tuir númeru sorteiu kompletu maka hanesan Partidu Esperansa da Pátria (PEP) númeru sorteiu 1, Partidu Demokrátiku (PD) númeru 2, Partidu Republikanu (PR) númeru 3, Partidu FRETILIN númeru 4, partidu Movimentu Sosiál Demokrata (MSD) númeru 5, partidu Movimentu Demokrátiku Nasionál (MDN) númeru 6, partidu Frente Dezenvolvimentu Demokrátiku (FDD) númeru 7 no partidu Aliansa Mudansa ba Progresu (AMP) númeru 8.

Hafoin dada númeru sorteiu ne’e, buletim votu sei atribui sekuénsia tuir númeru ne’ebé partidu polítiku sira hetan ona. Tanba ne’e, STAE bele hahú ona organiza buletim votu hamutuk ho CNE no mós lista sorteiu ne’ebé iha.

Prezidente Tribunál Rekursu (PTR), Deolindo dos Santos hateten, partidu polítiku sira tenke konfirma ho símbolu no naran partidu nian, nune’e bele konfirma iha Tribunál Rekursu, STAE no CNE.

Iha fatin hanesan, Diretór Nasionál STAE, Acelino Manuel Branco hateten, faze ba kandidatura remata horisehik, Tribunál Rekursu hasai ona desizaun finál kona ba lista kandidatura definitivu ba iha STAE.

“Husi lista kandidatura sira ne’e STAE bele ajusta ona ba iha buletim votu”, dehan nia.

Maski nune’e, antes ne’e sei kontakta partidu hotu-hotu atu bele aprezenta ba STAE modelu sigla ka emblema ne’ebé sira sei koloka iha buletim votu, nune’e sei halo ajustamentu, depois ikus mai sei hetan apresiasaun husi reprezentante husi partidu Polítiku sira no lori ba CNE atu halo aprovasaun.