Reuniaun ho Prezidente Repúblika, Francisco Guterres ‘Lú-Olo’ no Sekretáriu Jerál FRETILIN, Mari Alkatiri, ne’e akontese primeira-vés hafoin eleisaun iha loron 22 Jullu 2017, liubá.

Antes ne’e, Prezidente Repúblika hasai ona konvite ba dala rua hodi soru-mutu ho partidu polítiku sira, maibé Xanana nunka partisipa. CNRT delega de’it Sekretáriu Jerál, Francisco Kalbuadi Lay no lider Comissão Politica Nacional (CPN).

La’ós ne’e de’it, partidu FRETILIN liu husi ninia sekretáriu jerál mós konvida ona CNRT atu halo diálogu, maibé prezidente partidu CNRT la hola parte.

Reuniaun lider entre lider CNRT, FRETILIN no Prezidente Repúblika taka ba públiku. Soru-mutu ne’e la’o oras ida nia laran, hahú husi tuku 16:00 to’o tuku 17:00 liu.

Maski reuniaun ne’e konfidensiál, maibé haktuir Konstituisaun Repúblika Demokrátika Timor-Leste (K-RDTL), artigu 74 katak, “Prezidente Repúblika maka Xefe-Estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regulár”.

Atu garante unidade nasionál Prezidente Repúblika bolu lider partidu boot rua ne’e atu mantein nafatin estabilidade nasionál.

Tuir observasaun diáriu ne’e, situasaun iha Palasiu Prezidensiál diferente ho loron bain-leet. Gabinete Prezidénsia Repúblika taka metin portaun ba jornalista sira atu labele asesu ba laran.

Hafoin reuniaun lider na’in tolu ne’e mós sai ho modelu ‘klandestina’. Jornalista sira la konsege hetan lider sira ne’e bainhira hakat sai husi palasiu laran.

Povu Hakarak Lider Tuur Hamutuk

Entretantu, iha fatin ketak, Prezidente Partidu Libertasaun Populár (PLP), Taur Matan Ruak, sente kontente tanba konsege iha reuniaun trés partida entre Prezidente CNRT, Xanana Gusmão, Sekretáriu Jerál FRETILIN, Mari Alkatiri no Prezidente Repúblika, Francisco Guterres ‘Lú-Olo’.

“Primeiru ita basa liman. Ko'alia tanba Timor ne’e ita hotu nian. Ko'alia ne’e importante. Bele la konkorda malu, hanesan ita namora malu dala ruma putus tiha. Hola malu ona mós dala ruma selingkuh tiha, mas ita tenke ko'alia,” dehan Taur, iha Sede PLP, Metiaut-Dili, horisehik.

Ne’e duni, eis xefe estadu ne’e haksolok tebes tanba lider partidu polítiku sira loke ona sira nia fuan hodi bele ko'alia ba malu.

Nia esplika, povu iha iha eleisaun lejizlativa la fó maioria ba partidu ida. Ne’e duni, povu haruka buka malu tuur hamutuk ko'alia ba malu. Tanba sé de’it mak ukun, hotu-hotu ukun. Opozisaun mós manan, ida ukun mós manan no Timor mak manan.