Deputadu husi Bankada Partidu FRETILIN, Alexandrino Araújo hatete, implementasaun projetu auto estrada ne’e hanesan dezenvolvimentu nasionál, tanba ne’e povu ne’ebé hela besik iha ne'ebá hotu-hotu iha konxiénsia hodi kontribui liu husi entrega rai erransa hodi halo dezenvolvimentu nasionál.

Auto-estrada ne’ebé konstrui ona ne’e difikulta tebes atividade povu ki'ik sira ne’ebé nia toos, natar no fatin kulturál, tanba difisil ba sira atu hakat husi estrada sorin ba sorin.

“Ha’u haree povu ki'ik sira ba toos no natar sira hulan sira nian sasán hakur estrada ne’e tanba sira laiha estrada alternativa ida ba sira atu liu ba mai”, dehan nia, iha Plenária Uma Fukun PN, horisehik.

Nia hatete, ohin loron movimentasaun transporte seidauk másimu, tanba ne’e sira bele atravesa ba-mai, maibé aban bainrua kuandu transporte barak ona oinsá ho povu sira iha suku Matai ba sira nia toos no natar.

Deputadu ne’e, halo ona komunikasaun ho parte autoridade lokál suku Matai katak komunidade sira halo ona aprosimasaun ho kompañia ne’ebé kaer projetu ne’e prontu atu loke dalan alternativa, maibé tenke hetan orientasaun husi governu.

Iha fatin hanesan, Vise-Prezidente Bankada PD, Adriano do Nascimento hatete, auto-estrada liga Suai ba Beasu ne’e difikulta duni povu agrikultór sira nia atividade loroloron.

Agora daudaun ne’e atu tama ona ba loron finadu povu sira iha ne'ebá rate barak mak iha auto estrada nia sorin, entaun oinsá povu sira atu ba iha ne'ebá.

“Dalan atu ba rate ne’e taka ona ho auto-estrada, entaun tenke liu fali iha ponte okos”, dehan nia.

Tanba ne’e, husu ba governu liu-liu ba ministériu relevante atu tau atensaun ba asuntu ne’e atu ba oin labele difikulta atividade povu nian iha futuru.

Iha fatin hanesan, Vise-Prezidente Bankada FRETILIN, Francisco Branco hatete, kestaun kona-ba auto-estrada ne’ebé impede atividade povu nian iha suku Matai Munisípiu Kovalima ne’e fallansu mai husi estudu viabilidade.

“Ha’u hanoin ita falla iha estudu viabilidade, tanba ne’e konstrusaun hirak ne’e impede fali povu sira nia atividade rituais no agríkola nian”, tenik nia.

Kuandu dezenvolvimentu ida hari ba povu maibé sai fali impedimentu ba sira nia atividade, ne’e hamosu violasaun direitu umanu ne’ebé grave. Tanba ne’e, governu tenke haree ba asuntu ne’e hodi rezolve.