Nia hatutan, ho laran ksolok tebes no devér ne’ebé kumpre ona mak ohin taka aprezentasaun kona-ba programa Governu Konstitusionál VIII nian, iha Parlamentu Nasionál.
“Ha'u hakarak atu husik hela ha’u-nia liafuan apresu espesiál nian ida ba deputada no deputadu sira, ne’ebé intervein ona, oinsá hato’o imi-nia hanoin no sujestaun sira atu hadi’a dokumentu ne’e ho forma ne’ebé leál no onesta”, dehan nia, iha Uma Fukun PN, Sesta (27/7).
Nia dehan, hakarak fó lia menon ida liuliu ba opozisaun nia rekoñesimentu iha dezempeñu husi knaar ne’ebé la fasil, maibé importante tebes ba Governu atu labele akomoda, hodi haka'as-aan halo servisu ne’ebé di’ak liután ba povu.
Ne’e duni Matan Ruak dehan, buat sira ne'ebé unifika manifestasaun ida husi deputadu sira nia konfiansa iha kapasidade no determinasaun ba VIII Governu Konstitusionál.
Tuir nia, debate kona-ba programa Governu ne’e, hatudu katak maski iha hanoin no ideolojia polítika ne’ebé la hanesan, bankada Parlamentár hotu-hotu hala’o knaar ho laran tomak atu halo Timor-Leste sai nasaun ne’ebé justu, inkluzivu, moris-di’ak no dezenvolvidu liután.
Tanba ne’e, PM Matan Ruak dehan, atu asegura katak hanoin sira ne’ebé iha sei hetan konsiderasaun hotu, tanba ne’e maka durante ezekusaun programa ne’ebé agora Parlamentu Nasionál aprova ona, sei buka nafatin bainhira iha razaun.
