Atu valoriza kultura Timor, Prezidente Partidu Libertasaun Populár (PLP) Taur Matan Ruak promete karik hetan fiar husi Povu atu kaer ukun sei fó subsídiu ba povu atu hadi'a hotu uma lisan sira iha territóriu Timor laran tomak.
Objetivu atu jerasaun tuir mai labele atu haluha kultura no identidade nasaun no bele atrai turista sira hodi bele mai vizita hodi hetan rendimentu.
Eis Prezidente Repúblika ne’e dehan, hakarak harii fali uma lulik no kapela sira tanba uluk luta na'in sira halo funu mai hakne'ak hodi hasai sasan lulik iha uma lulik hodi hafutar halo funu no funu hotu haluha tiha.
Taur dehan, atu atrai turista sira no hamoris fali lia na'in sira (hukum adat) atu halo prevensaun konflitu atu problema ruma mosu iha suku laran lalika lori ba tribunál.
“Ita nia Partidu promete atu fó subsidiu para hadia uma lisan sira. Ita hakarak valoriza lia nain sira no justisa tradisionál”, dehan Prezidente PLP bainhira halo komisiu politika iha kampaña munsipiu Ainaru vila, Sábadu (24/06).
Nia dehan atu hamoris fali moradór hodi halo tebe dai tanba agora ida ne’e komesa au menus ona lae ema estranjeiru mak promove instrumentu hanesan katana, bibi fulun, manu fulun, tais, tambór.
Lia na'in ho moradór sira sei la servisu saugati sei hetan subsídiu ba ninia servisu bainhira sira simu ema boot ida iha ne’e ba oin sei la servisu gratis no Xefe suku mós sei la mobiliza simu ema boot ho gratis.
“Ita hakarak hamoris ita nia identidade ita nia kultura no lisa atu distinge ita na an ho ema seluk lae aban bainrua ita sai fali hanesan bibi malae”, dehan nia.
Kampu Traballu
VI Prezidente PLP Fidelis Magalhães iha ninia intervensaun bainhira halo kampaña aberta iha munisípiu Manufahi promete sei fó prioridade ba juventude sira liuliu kria kampu traballu.
Tanba nia dehan, maioria juventude Timor Leste konstitui 60% dezempregu no futuru la iha oportunidade tanba laiha formasaun adekuadu.
Eis Xefe Kasa Sivíl Prezidente Repúblika ne’e dehan, programa integradu PLP ba joven sira programa servisu militár obrigatoriamente no aumenta tékniku vokasionál ida ne’e programa ne'ebé boot.
“Hili lideransa ne'ebé koñese imi nia realidade moris no sei la iha ministru ida mak atu bosok imi tanba nia koñese di'ak ona Suku 442 nia moris”, dehan nia.
