Prezidente CNRT Xanana Gusmão hateten, CNRT nia kompromisu polítiku ba mandatu 2017-2022 sei tau prioridade atu dezenvolve setór ekonomia rai laran hodi hasae produtu lokál.

Kaer ukun, Xanana dehan, dezenvolve setór potensiál agrikultura iha kada munisípiu atu labele depende ba produtu importasaun sira.

“Ita tenke hatudu ona produtu Timor Leste nian, labele depende demais ba produtu importasaun husi nasaun li'ur”, dehan Xanana liu husi diskursu iha kampaña polítika eleisaun lejizlatura iha Gleno –Ermera,Segunda (26/06).

Xanana afirma, partidu CNRT la halo promesa ‘falsu’ ba povu sira iha kampaña polítika,maibé hato’o de'it ninia kompromisu polítika.

Tanba, lider CNRT ne’e dehan, atu halo dezenvolvimentu iha nasaun ida tenke liu husi prosesu ida, la'ós halo dezenvolvimentu ho ansi.

Iha fatin hanesan, Koordenadór CNRT Munisípiu Ermera Domingos Lemos husu ba militante no simpatizante Munisípiu Ermera atu  hamutuk ho Xanana hili CNRT tanba CNRT maka sei dezenvolve Timor-Leste hodi hasae povu husi kiak no mukit.