Ministru Defeza, Filomeno de Jesus Paixão hateten, programa Governu kontinua tau prioridade ba instituisaun F-FDTL, liuliu Komponente Aéreo tanba oras ne’e F-FDTL iha ona aviaun operasaun ida.
“Ba Ha’u Komponente Aéreo loke ona, ne’ebé ami sei halo estudu mak ita tenke hola elikópteru tolu (3)”, dehan Ministru Meno Paixão, iha edifísiu Ministériu Finansas Ai-Tarak Laran, horisehik.
Nia dehan, bainhira Governu atu sosa elikópteru tolu ne’e la’ós halo funu, maibé prioridade oinsá, Ministru Defeza sei hato’o iha enkontru Konsellu Ministru mak sei deside.
Tuir planu instituisaun F-FDTL harii Komponente Aéreo, tanba ne’e kompañia Aéreo Dili oferese aviaun operasaun ida ba F-FDTL, tanba membru F-FDTL na'in tolu remata ona kursu ba pilotu, nune’e na’in hitu seluk remata ona kursu mekániku ba aviaun nian.
Maski nune’e, elikópteru nia presu ho montante boot, nune’e manutensaun mós sei susar. Tanba ne’e Governu sei tetu molok implementa atu sosa elikópteru tolu.
