Prezidente PD, Mariano Assanami Sabino hato'o lia hirak ne'e iha komísiu polítiku ba militante no simpatizante iha Postu Lautem, Munisípiu Lautem , Tersa (11/07).
“Ita hakarak projetu hotu-hotu mai husi ita nia rikusoin setór privadu Timor mak tenke prioridade para kaer projetu,” hatete Assanami.
Assanami hatutan, bainhira setór privadu Timor hamutuk ho setór privadu estranjeiru mak empreza Timor oan kaer hodi halo investimentu 70% no empreza estranjeiru 30%.
PD hakarak nia atu reforsa setór privadu Timor atu nune’e fasilita sira atu kaer projetu boot. Atu nune’e osan labele sai fali ba ema nia rain.
“Tanba ne’e ita la husik dolar ne’e, hela dolar fali sai ba li'ur, tanba ne’e PD sei taka kuak atu osan dolar sira labele dolar ba li'ur,” hatete Assanami.
PD Hatutan Mehi Funu Na’in
Timor-Leste hanesan nasaun soberanu Repúblika Demokrátika Timor-Leste (RDTL) no fó liberdade ba sidadaun hotu atu harii partidu inklui Partidu Demokrátiku (PD), ne'ebé oras ne'e ho idade joven (16)avansadu daudaun, PD ho mehi ida "Atu Hatutan Mehi Funu Na'in Timor-Leste" nian ba konstrusaun estadu iha era dezenvolvimentu estadu.
Atu hatene Partidu Demokrátiku (PD) nia prinsípiu, ideolojia, valór, étika, polítika, karakter, vizaun, polítika, boa governasaun, ekonómika, sósiu kulturál, infraestrutura no dezenvolvimentu institusionál, Prezidente PD, Mariano Assanami Sabino fó sai ba públiku.
Prezidente PD, Assanmi husu ba militante, simpatizante no povu TL. Tenke kuidadu, TL nasaun unitáriu, labele hamoris fali primordiál (primordiál).
“Labele dehan ha’u ne’e Oekusi, ha’u ne’e Lautem, ha’u ne’e Baukau, ne'e labele. Ita bele moris iha Baukau, Oekusi, kebetulan ita mai husi inan ho aman ida ne’ebé ke tenke moris iha ne’ebá, mas moris mai nu’udar Timoroan totalidade. Bele moris iha ne’ebé de’it, maibé o nia lulik, espíritu no eransa ne’e iha fatin hotu-hotu”.
"Ha’u hakarak husu ba inan-aman sira katak, imi bele iha partidu oi-oin, maibé iha tinan 2017 imi fó imi-nia votu ba PD, tanba PD hanesan kontinuadór hodi hatutan mehi funu na’in sira-nian”.
Assanami dehan, votu no konfiansa ne'ebé povu fó ba PD, sei suli iha raan, iha esperansa no espíritu, baihira serve la tuir povu nia hakarak.
"Imi bele la-fiar depois de tinan lima (5),’ mais ami, imi-nia oan sira, ne’ebé ke fó aan, fó totalidade."
“Ami laran-moras, bainhira ami-nia aman sira ne’ebé mak ami respeitu no ami loyal tebe-tebes, palku leten hodi ataka malu. Ami hanoin katak, Partidu Demokrátiku ninia manán ne’e manán FRETILIN nian, manán CNRM nian, manán CNRT nian no manán ASDT nian” dehan Assanami.
