Nia dehan, partidu CNRT manan hakarak atu konstrui obra boboot sira ne’ebé iha mandatu tinan sanulu (10) nia laran la konsege halo hotu.

Tanba partidu CNRT rasik hakarak atu halo kontinuasaun ba obra sira ne’ebé planeadu ona tuir programa Planu Dezenvolvimentu Nasionál (PDN) husi 2011 – 2030.

Maski nune’e, Prezidente partidu CNRT ne’e laiha ambisaun ba kadeira Primeiru Ministru, maibé mehi boot ne’ebé nia hakarak mak oinsá dezenvolve nasaun ne’e.

Prioridade eis-Comandante em Chefe das FALINTIL ne’e, ninia prioridade dahuluk bainhira ninia partidu manan mak oinsá muda nasaun ne’e sai dezenvolvidu no hasai povu husi ki’ak no mukit.

“Ha’u kontente CNRT manan, la’ós atu sai Primeiru Ministru, maibé ha’u kontente atu dudu dezenvolve rai ida ne’e”, dehan nia, iha komísiu mini kampaña partidu CNRT, iha kampu futeból Dom Bosco Komoro-Dili, horisehik.

Tuir prioridade partidu CNRT nian iha kampaña 2017 maka hakarak kontinua área importante haat, hametin pás no estabilidade, hadi’a infraestrutura bázika, kria kampu servisu liuliu ba joven sira no hametin governasaun di’ak hodi hakbesik prestasaun servisu ba povu.