DILI: Tuir ajenda iha loron Kinta (20/07), tuku 10:00, estrutura tomak Partidu Demokrátiku sei fó omenajen ba Saudozu Fernando La-Sama de Araújo liu husi serimónia misa agradesimentu iha igreja Maria Auxiliadora –Kampu Baru-Dili kontinua kari ai funan iha Metinaru.
Maski, durante fulan ida estrutura tomak PD hala’o kampaña lejizlativu,maibé sira la haluha saudozu matebian Fernando La-Sama ne’ebé husik hela sira (PD).
Konsellu Polítika Nasionál(CPN) Nino Pereira hatete estrutura PD konvida militante no simpatizante tomak atu partisipa iha serimónia ne’e, hodi fó omenajen ba eroi Saudozu La-Sama.
“Ita nia maun saudozu La-Sama nu’udar figura ida ne’ebé la hatene kolen no baruk”, dehan nia Kampaña Lejizlativa ba dala ikus iha Eliportu-Bairru Pité, Kuarta(19/07).
Nia dehan, Maun La-Sama lakon nia vida no husik hela PD bainhira hala’o ninia knaar nu’udar Ministru Koordenadór Asuntu Sosiál no Ministru Edukasaun iha Munisípiu Covalima ne’ebé eroi ba libertasaun hatuur ona iha ninia fatin,maibé eroi ba dezenvolvimentu presiza dedikasaun.
Nia relembra Saudozu La-Sama molok atu hakotu ninia iis husik hela lia menon ba kontinuador Partidu nian katak “Ha’u nia dignidade la aas liu dignidade estadu nian. Hare malu ba hodi lori nasaun ne’e ba oin”.
Ho nune’e, nia hatete, Saudozu Fernando La-Sama hatudu ona ninia prestasaun nu’udar lideransa tanba ema ne’ebé kalma nonook,pasiénsia no hakarak hakuak ema hotu.
Kalohan: Povu Labele Tauk Vota PD
Entregantu, Sekretáriu Jerál Partidu Demokrátiku(PD) António da Conceição ‘Kalohan’ hatete povu timor leste tomak labele ta’uk vota ba Partidu Demokrátiku iha loron 22 fulan-Jullu.
Nia dehan, timoroan sira tenke kuidadu no labele hili partidu ne’ebé ragu-ragu atu foti desizaun ba povu nia moris di’ak. So úniku PD mak brani hola desizaun ne’ebé tu’u ba PD.
Kalohan afirma, PD mak partidu jerasaun foun nian no kontinuador husi luta jerasaun antigu sira nian tan ne’e lalika hanoin barak kontinua fó fiar ba PD para kaer ukun iha tinan 2017-2022.
“Ha’u husu ba eleitór sira hotu katak loron 22 fulan-Jullu vota ba Partidu Demokrátiku tanba hatudu ona ninia progresu iha tinan 15 nia laran”,dehan Sekjen PD ne’e iha kampaña dala ikus iha Eliportu Bairru Pité, Kuarta(19/07).
Tanba nia dehan, Progresu obra ne’ebé mak PD halo hatudu ona rezultadu hanesan Irrigasaun Tono, Manatutu, Suai inklui ponte sira. Maibé iha tempu kampaña partidu balun uza obra PD nian hodi hateten ba nia militante sira katak sira mak halo.
Nia husu militante no povu tomak Lalika hanoin barak vota de’it ba PD tanba planu Partidu nian tenke halo duni revolusaun ba sistema ne’ebé la di’ak atu aselera dezenvolvimentu iha nasaun ne’e.
