Desizaun ne’e, Partidu Demokrátiku foti liu husi konferénsia Nasionál ne’ebé realiza iha loron Sábadu (10/03) hamutuk kuadru polítiku sira husi munisípiu 12 inklui RAEOA.

Prezidente Partidu Demokrátiku (PD), Mariano Assanami Sabino hatete, PD deside ona hodi la’o mesak ho identidade rasik, maibé sei halo koligasaun ho Populasaun hodi enfrenta Eleisaun Antisipada.

Nia dehan, PD deside la koaliga ho Partidu Polítiku iha EA tanba fiar aan sei hetan asentu parlamentu nasionál ho kadeira 7 ba leten.

“Ami sei halo aliansa boot ida ho Povu tomak la’ós ho partidu seluk tanba ami hamriik atu defende konstituisaun hodi konstrui estadu liu husi planu no programa ne’ebé hakerek ona iha Planu Estratéjiku Dezenvolvimentu Nasionál (PEDN),” dehan nia hafoin Konferénsia Nasionál iha Delta Nova –Komoro, Sábadu (10/03).

Razaun la’o mesak, Assanami dehan, Konstituisaun RDTL garante multi partidária tan ne’e PD lakohi atu koaliga ho ParPol iha eleisaun Antesipada.

Partidu Demokratiku moris nia abut metin ona iha povu nia fuan partidu ne’ebé kada períodu aumenta ba beibeik kadeira iha PN mak tun sa’e, maibé PD metin ona.

Nia dehan, Kader partidu Demokrátiku mesak foin sa’e de’it iha ona esperiénsia atu ukun hodi halo jestaun ba rikusoin estadu nian hodi fó moris ba povu tomak.

Nia dehan, Realidade hatudu ona iha tinan lima opozisaun iha FRETILIN nia ukun no tinan 10 iha governasaun hodi ukun hamutuk ho Maun boot Xanana iha AMP no konsege dezeña Programa PEDN ne’ebé sai hanesan mata dalan ba dezenvolvimentu Nasionál.

 “Eleisaun Antesipada ne’e lider sira tenke hakruk ba povu hodi husu deskulpa tanba sira tenke lakon tan tempu no servisu hodi mai vota dala ida tan,” dehan nia

Atu haboot no hametin PD, nia husu kuadru partidu sira iha baze tenke servisu makas hodi konvense povu hodi bele vota ba PD iha loron eleisaun.

Matéria Kampaña, Assanami dehan, Partidu Demokrátiku sei lori nafatin programa VII governu nian ne’ebé mak dezeña husi partidu rua hanesan PD no FRETILIN programa sira ne’e hatutan husi PEDN.

Assanami afirma, atu deside lista kandidatura ba Parlamentu Nasionál ne’e PD iha mekanizmu rasik hodi la’o tuir tanba ne’e kada tinan lima-lima sempre hafoun hotu membru deputadu sira tanba  iha kader barak ne’ebé presiza atu promove.

“Lista kandidatura ami seidauk bele fó sai mas ami ba rejistu iha Tribunál  Rekursu iha loron 21 fulan- Marsu mak bele deklara sai ba públiku,”Dehan nia.